Youth Olympic-a inlan tur Jeremy

Mizo weightlifter Jeremy Lalrinnunga chuan 2017 tawp lam khan Vanglaini hnenah, "Olympic khelh hi ka tum ber a ni a, chumi a hlawhtlin hma chuan ka bei ang," tiin a lo sawi tawh a, tunah chuan Govt. Complex rawlthar duhawm hi a duhthusam a thleng dik dawn ta - 3rd Youth Olympic khel turin a tling.

Sports Authority of India chuan October 6-13 chhunga Argentina khawpui Buenos Aires hmuna inlan tur thlanna chu nimin khan a nei a, weightlifting huangah Jeremy Lalrinnunga leh Sneha Soren-i te chu an tling - Soren hi 48kg huanga khel a ni thung.

Mizo rawlthar Jeremy hi 62kg category-ah a inlan a, snatch-ah 126kg chawiin, clean & jerk-ah 147kg - a vaiin 273kg a chawi a, a sulhnu hi India ramah chuan Youth leh Junior huangah record thar a ni nghal.

India tana medal tam tak chawi chhuak tawhtu Jeremy chuan, "Ka beisei aia ṭhain ka chawi, hetiang dinhmun ka thlen theih chhan chu Pathian vang a ni. Mizo mipui zingah bang loa min ṭawngṭaipuitu an awm tih ka hria, a chhanna kan hmu niah ka ngai," tiin Vanglaini a hrilh a, amah chher chuaktu coach Malsawma Khiangte (SYS) leh Zarzokima (Army Boys) bakah Mizoram Weightlifting Association president Thangchungnunga chungah a lawm thu a sawi bawk.

Olympic chungchang sawi zawmin Jeremy chuan, "Youth Olympic-ah hian kan ram tan medal chawi chhuah ngei tumin ka bei dawn a, hei bakah hian senior huangah pawh inlan chhoh theih ngei ka tum ang," tiin Vanglaini a hrilh.

Mizoram Weightlifting Association chuan kum 2011, October thla khan Govt. Complex-ah Weightlifting Academy State Sports Coaching Centre a din a. He hmunah hian Weightlifting coach Malsawma Khiangte (SYS) kaihhruaina hnuaiah Govt. Complex rawlthar Jeremy hian a zinkawng bul a ṭan, hemi hnuah Army Boys, Pune-ah inzir chhunzawm lehin hmalam panin a kal mek zel.