Chhinga Veng leh Mizoram Police semifinal AN lut

LG Independence Cup-ah Chhinga Veng chuan group B hmahruaitu ni turin nimin tlai khan Chawnpui FC in an hneh a, Mizoram Police-in MPL kaithar aia head to head-a an ṭhat zawk avangin semifinal an lut ve nghal bawk.

August 10, Zirtawpni zan 7:30-ah Chhinga Veng-in semifinal-ah MPL club an nih hnua hneh loh la tawng lo Electric Veng an hmachhawn ang a, Inrinni zan dar 7:30-ah Mizoram Police leh I League club Aizawl FC te an inkhel ang. Final hi August 15, Nilaini a khelh tur a ni.

Danglamna Dawngtea

Chawnpuiin semifinal beiseina nen Chhinga Veng an hmachhawn a, MPL kaithar tana a harsatna erawh dinhmun chhe zawkah an ding a, chak ngei an mamawh. Lalremtluanga hote khel ṭha mah se chance ṭha an insiam thei lo a, Chhingcows keeper Zothanmawia tana harsa tur a awm lo.

Squad chhah ṭha zawk Chhinga Vengin goal khungna chance ṭha an nei a, Lalrammuanpuia'n box chhunga a 'first touch' ṭhat tawk loh avangin goal ngeina tur a hlah. Minute 70-naah MS Dawngliana'n danglamna a thlen a, mawi zetin goal kilah a pet lut. Bawngkawn tlangval Dawngtea hian goal a khung hnu lawkah goal khungna chance a nei a, Chawnpui keeper tih per chu hnai set sawt aṭangin crossbar bak a pet per thei lo.

Chawnpuiin an siphurh an sut theih loh avangin point an hlawh chhuak lo a, semifinal beiseina a thamral zui bawk.

Police an vannei

Mizoram Police-in training-na hun ṭha an mamawh a, group match hnuhnung ber khelh hmaa an awl avangin an mamawh tak an hmu a. Chhinga Vengin Chawnpui an hneh sak avangin Lalbiaksanga Colney hoten semifinal thlir chung leh hahdam takin Jamshedpur an hmachhawn tihna a ni.

Nizana Police leh JFC inkhel result kan hre hman lo a, BS-a hote hi an squad a chhah ṭhat avangin Aizawl FC nena an inkhel tur hi mipui nghahhlelh a ni ang.

Group B
Results & Fixtures
28 July, Inrinni
Mizoram Police FC 2 - 1 Chawnpui FC
MPFC : Lalbiakhlua 61'; Lalfakzuala 62'
CHFC : Vanlalnghenga 7'
MoM: Lalbiakhlua, MPFC
Chhinga Veng FC 2 - 0 Kanan FC
CVFC : Vanlalzuidika 13'; Lalromawia 73'
MoM : Lalromawia, CVFC
1 August, Nilaini
Kanan FC 1 - 2 Mizoram Police
KFC : Lalhriatpuia 90+2'
MPFC : R. Malsawmtluanga 37'; V. Laltanpuia 70;
MoM : V. Lallaltanpuia, MPFC
Chawnpui FC 2 - 1 Jamshedpur FC
CHFC : Subham Ghosh 54' (OG); Lalramliana 76'
JFC : Billu Telli 35'
3 August, Zirtawpni
Jamshedpur 2 - 2 Kanan FC
JFC : Billu Teli 5'; Rakesh Yadav 84'
KFC : Joseph Lalvenhima 9'; H Malsawmtluanga 34'
MoM: Rakesh Yadav, JFC
Mizoram Police 1 - 2 Chhinga Veng FC
MPFC : R Malsawmtluanga 43' (P)
CVFC : Lalmuansanga 18'; Lalrinchhana 87'
MoM : MS Dawngliana, CVFC
6 August, Thawhṭanni
Chhinga Veng 1-0 Jamshedpur
CVFC : MS Dawngliana, 3'
MoM : MS Dawngliana, CVFC
Kanan FC 0-1 Chawnpui FC
CHFC : David Laltlansanga 62'
MoM: David Laltlansanga, CHFC
August 8, Nilaini
Chawnpui FC 0 - 1 Chhinga Veng
CVFC : MS Dawngliana 70'
MoM: Lalruatfela, Chawnpui FC
7:00 PM Jamshedpur Vs Mizoram Police
(Result kan hre hman lo)