Chhuak si lo; chhuak thei dinhmuna ding mek te!

Zanin dar 1:30-ah Premier League transfer a tawp tawh dawn a, season dang angin club-ten league ṭan hnuah player an lei thei tawh dawn lo.

Hetiang boruak karah hian player chhuak tur anga sawi, he thu buatsaih a nih lai thlenga an club chhuahsan si lo an awm nual a, season dang ang bawkin heng player-te hi transfer bazar tawp ni ti ngaihnawmtu turte an ni dawn.

He thu ziah a nih lai thleng hi chuan Anthony Martial a chhuak ang em? Tottenham Hotspur-in player an lei ang em? United hian centre back thar an nei ang em? tihte chu zawhna a ni vek a, August 9 hnuah a chhanna pek kan ni dawn - tun hi inrin siak a nawm vanglai tak a ni!

Toby Alderweireld (Tottenham)

Kum 29 mi hi season hmasaah hliam vangin a talbuai a, hliam a neih hmaa regular player hian a dam hnuah a beisei angin hmun pawimawh a chan chhunzawm lo a, Spurs chhuahsan thei dinhmunah a ding mek.

United chuan Belgian defender hi lakluh ngei an duh a, mahse season tawp ruala a contract tawp mai tur defender manah Spurs-in pound maktaduai 75 an ngiat a, United tan sum bawm chhut hawn a harsa rih.

Jack Grealish (Aston Villa)

English midfielder duhawm hi Tottenham leh Chelsea ten an duh nia sawi a ni a, Spurs hian pound maktaduai 20 nen an dawr tawh.

Mahse, Villa hian an player pawimawh manah pound maktaduai 40 an chhiar a, Spurs hian an ngamna zat tipung mah se Villa beisei zat hi pound maktaduai sarih velin an la phak lo mek.

Danny Ings (Liverpool)

Kum 26 mi Liverpool striker hian Anfield-ah season thum hun a hman chhungin beisei a phak lo a, hliam vangin a talbuai bawk.

Crystal Palace, Southampton, Leicester leh Newcastle ten lakluh an duh vek a, a man zat atana Reds beisei zat erawh pound maktaduai 20 a ni thung.

Harry Maguire (Leicester)

England tan World Cup-ah ropui taka a khelh avangin Maguire-a'n duhtu a nei hraw a, Leicester City defender hi Manchester United chuan pound maktaduai 65-a lei tumin an dawr tawh.

Mahse, Foxes chuan khawvela defender manto ber nih tir tumin pound maktaduai 80 an chhiar a, Hull City defender hlui man atan United hian heti zat hi an theh chhuak phal kher ang em? Hunin a ti chiang thuai dawn e.

Anthony Martial

(Manchester United)

United-in Alexis Sanchez an neih hnuah Martial tan hmun a awm meuh lo a, World Cup nomawi chawitu France team-ah a tel phak loh phah hial.

Tun hnaiah United pre-season laia a nupui nau nei ṭawiawm tura a haw avangin Jose Mourinho nen an inkar boruak ṭha lo sa a ṭhat loh belh a, Tottenham, Chelsea leh Paris St-Germain nen sawizawm mek an ni - a man a tan erawh pound maktaduai 80 beisei a ni.

Simon Mignolet (Liverpool)

Season hman zawh takah Reds tan Mignolet inlan nual mah se a tawp lamah chuan Loris Karius a dingchang zawk a, Alisson Becker a awm belh tak bawk avangin Belgian keeper hi a chhuah a rinawm hle.

Barcelona chuan kum 30 mi keeper hi Marc-Andre Ter Stegen thachhang dawltu turin an duh a, Turkish club Besiktas chuan Fulham laka Fabri an chan hnuah lakluh tumin an hel ve bawk.

Aaron Ramsey (Arsenal)

Kum 27 mi midfielder hian Arsenal-ah kum 10 chhung hun a hmang tawh a, Arsenal ti 'Arsenal' tu zinga mi a ni tawh. Welsh midfielder hian kum khat chauh contract nei tawh chungin a pawtsei lo a, hei vang hian English club lian hoin lak tumin an hel mek.

Chelsea leh Liverpool-in Ramsey hi lakluh an duh ve ve nia sawi a awm a, club pahnih hian an duh tak tak a nih chuan pound maktaduai 35 aia tlem lo an inhuam ve a ngai thung ang.

Wilfried Zaha (Crystal Palace)

Ivory Coast international tlan chak hian season hmasa khan season ṭantir lamah bul ṭan thei lo mah se match 29-a inlanah goal kua khungin assist vawi thum a nei a, Palace tan innghahna a ni.

Palace boss Roy Hodgson chuan a player hi chelh a duh thu sawi mah se Zaha duhtu zingah Borussia Dortmund, Chelsea leh Tottenham an tel avangin chelh reng a harsa ang.