India U16-in chak chungin WAFF mangṭha

WAFF U-16 Championship khela feh chhuak India Under 16 team chuan nimin khan an beisei ang ngei result an hlawh chhuak a, an match hnuhnung berah team ṭhaa ngaih Yemen chu 3-0 in an sawp.

Blue Tigers rawlthar rual tan Harpreet Singh, Ridge Demello leh Rohit Danu ten goal khat ṭheuh an khung a, tournament 'duhthusam' tia chhal theih an hmang.

Amman, Jordan-a inelna hi league anga khelh a nih avangin team tel panga zinga point hmu sang ber Japan chu an champion a, Blue Samurai hi India-in an hneh loh awmchhun an ni.

India U16 hian an match hmasa berah inelna thlengtu Jordan chu 4-0 in an sawp a, U16 Asian champion Iraq chu 1-0 in an hneh a, Japan erawh 2-1 in an ngam lo thung.

September aṭanga khelh ṭan tur AFC U16 Championship Ma­laysia 2018 atana inbuatsaih mek team-ah hian Mizo rawlthar pali Serchhip midfielder Eric Rem­­ruatpuia Chhang­te, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te an tel a ni.