Djokovic chak niah Wawrinka vannei

Novak Djokovic chuan a vawi nga nana Rogers Cup champion ni turin bul a ṭan fuh a, mipa singles player langsar dang Stan Wawrinka pawhin Nick Kyrgios lakah set hmasa ber hloh mah se harsa takin hnehna a chang hram.

Thawhlehni zan Toronto-a inkhelah Djokovic hian Mirza Basic chu 6-3, 7-6 (7-3) in a hneh. Serbian tlangval hi Australian Open-a a hneh loh Hyeon Chung hmachhawn tur a ni a, mahse South Korean tlangval hi hliam vanga a inhnuhdawh vangin Basic nen an intawng ta zawk a ni.

Grand Slam vawi 13 champion tawh Djokovic-a'n a match lehpekah chuan Peter Polansky a hmachhawn leh ang. Tun innelnaah Djokovic hi seeded pakuana a ni a, hliam vangin season hmasa chawhnu lam leh kumin kum tir lam che fuh lo mah se, clay court season aṭangin a khel ṭha tawh - Wimbledon title a la leh thei tawh hial.

Inkhel dangah Grand Slam vawi thum champion tawh Wawrinka chuan Australian star Nick Kyrgios chu 1-6, 7-5, 7-5 in a hneh. Swiss tlangval Wawrinka hi a khup hliam vawi hnih zai a nih hnuah tun hma angin a la khel chhuak thei lo, tunah hian world number 195 ni mekin, a inkhelh thiamna hard court-ah beisei a nei sang chho hle.

Japanese player Kei Nishikori pawhin Robin Haase chu 7-5, 6-1 in a hneh. Wimbledon leh Washington Open khel ṭha tha tak Nishikori hian vawi 11 aces a siam thei a, tun hma lama final a khelh tawhna US Open atan inbuatsaihna a nei ṭha chho hle a ni. Russian Karen Khachanov pawhin Filip Krajinovic 6-3, 6-2 in a hneh a, khawtual tlangval Sam Querrey-a'n 6-2, 7-5 in Adrian Mannarino a hneh bawk.