Keeper manto ber tur Kepa?

Chelsea chuan goalkeeper thar an melh a, Kepa Arrizabalaga chu Athletic Bilbao aṭangin an lalut ngei dawn niin a lang. Spanish keeper lei turin pound makatduai 71 zetin inremna an nei tawh niin khawthlang media ṭhenkhat chuan an tarlang.

Kum 23 mi Kepa hi an la a nih chuan Thibaut Courtois thlakna tur a ni ang a, pound maktaduai 66.8 man Liverpool keeper Alisson Becker khumin khawvel keeper manto ber a ni ang.

Blues boss Maurizio Sarri chuan, "Kum khat liam ta khan Kepa hi ka hmu tawh, ka hmuh hmasak bera ka rilrua rawn lang chu - goalkeeper ṭha tak a ni, a kum a la naupan ngaihtuahin in a ṭha tawh takzet a ni," tiin kum khat liam taa an inhmuh tawh chungchang a sawi.

Season hmasa nipui lai khan Blues-in Real Madrid striker Alvaro Morata chu pound maktaduai 58 in an lei a, an club player manto ber a ni mek - keeper Kepa an lalut thar a nih chuan chiang takin he record hi a rawn khum bawk ang.

Nimin zing khan Chelsea hian season thar inbuatsaihna tura an match hnuhnung ber an khel a, Ligue 1 club Lyon nen hun pangngaiah goal awm loa an inhneh­tawk hnuin penalty-ah 5-4 in hnehna an chang.

World Cup khelh vanga team training zawm tlai - Eden Hazard, Olivier Giroud leh N'Golo Kante te chuan inkhel bul ṭan lo mah se bench aṭanga luhtir an ni a, Blues manager Sarri chuan an player an awmkhawm kim ta chu a hlim thu a sawi.

Napoli manager hlui Sarri chuan, "Nilainiah kan squad pangngai kan kim thei ta, kan theihna tak lanchhuah tir tur chuan thla hnih emaw, thla thum chhung hun kan mamawh ang," a ti. Italian manager hian Courtois awm loh laiin a player an kim thu a sawi a, hei vang hian Belgium international hi a chhuak ngei ang tih a nemnghet.