Lewandowski dah sangtu Kovac

Bayern Munich manager thar Niko Kovac chuan Robert Lewandowski chu khawvela striker ṭha berte zinga mi a nih thu a sawi a, a club hlui Eintracht Frankfurt nen Super Cup an khelh hunah chak ngei a tum thu a sawi bawk.

Season hmasa khan Lewan­dowski-a'n league-ah goal 29 khungin Bundesliga top scorer a ni a, Poland international hi club lian dang nena sawi zawm fo ni mah se Allianz Arena a chhuahsan dawn lo niin a lang.

A striker chungchang sawiin Kovac chuan, "Robert nen inbiakna kan nei a, amah ka hmuh dan leh ngaihdan pawh a hria. Ani ang khawvela striker ṭha berte zinga mi hi chu club-in chhuah a phal lo a, ani pawhin kan hnena khelh zel a duh niin ka hria," tiin a sawi.

Kum 29 mi Lewandowski hian Bundesliga match 257 a khelh aṭangin goal 180 a khung tawh a, Germany football inelna sang berah hian goal khung hnem pangana a ni mek.

German champion Bayern Munich hian season thar an match hmasa atan Pathianni zan hian Eintracht Frankfurt chu Super Cup an khelhpui ang.