Sum tam tak nen Newcastle an liam

Football-in thawnthu ngaihnawm tak tak min hlui fo ṭhin, a bik takin knockout tournament hian beisei loh result min hmuhtir fo. Sum an ngah thar avanga ngaihven hlawh Newcastle United chu League One club Cambridge United hneh loin an tla.

St James' Park-a inkhelah Magpies legend Alan Shearer ngaisangtu Joe Ironside-a goal khat khung hmangin Cambridge hian 1-0 in hnehna an chang a, khawvela cup inelna upa berah hian fourth round an lut.

Premier League champion Manchester City, Chelsea leh Leicester City te erawh an khingpui ṭheuh sawp chungin an tlang a, goal nga luhna inkhelah Everton chuan Hull City 3-2 in an hneh hram bawk.

Mangṭha Magpies
Sum an ngah, mahse an hmang thei ṭan chauh. Atletico Madrid aṭanga an lei thar Kieran Trippier-a'n a vawi khat nan inkhel bul a ṭan a, manager Eddie Howe-a'n chak an mamawh tih a hriat chian avangin a player neih ṭhat a chhawr.

English football-ah EPL a sang ber a, a dawtah Championship - chumi hnuaiah chuan League One an awm. League One team 24 inel zingah Cambridge United hi 16-na an ni mek, an tan chuan Shearer-a tualchai tawhna St James' Park-a inkhelh hi thil châkawm a ni.

Inkhel en tur hian Cambridge fans 5,000 chuang an zin a, an beiseina a thlawn lo. Minute 56-naah Ironside-a'n goal awmchhun a khung a, goalkeeper Dimitar Mitov a chetsual duh miau loh avangin khualmualah hnehna hlado an chham.

City chak chiang
Hripui a kai avangin Pep Guardiola-a'n a naute a ho thei lo a, assistant manager Rodolfo Borrell hoin Manchester City an feh chhuak. Premier League champion hian League Two club Swindon Town chu 4-1 in an luhchhuah.

Man City hian nomawi chawi theih zawng zawng chawi an duh ṭhin a, chuvangin inelna hniam deuh zawkah pawh player ṭha an chhawr mai ṭhin. Swindon Town lakah goal khungtu pawh Bernardo Silva, Gabriel Jesus, Ilkay Gundogan leh Cole Palmer te an ni.

Kevin de Bruyne, Rodri, Joao Cancelo, Ruben Dias, Kyle Walker leh Nathan Ake te an khelh bawk avangin League Two club tan chet ngaihna a awm lo. Raheem Sterling, Phil Foden leh Jack Grealish te chu zin chhuak loin an la dah ṭha thei a, an squad a chhuah ṭha takzet.

5 Star Chelsea
Thomas Tuchel pawhin chetsual a tum lo - Christian Pulisic, Timo Werner leh Romelu Lukaku ten tlarhmaah bul an ṭan nghal ṭhap. Werner, Callum Hudson-Odoi, Lukaku, Andreas Christensen leh Hakim Ziyech te goal hmangin National League club Chesterfield chu 5-1 in an sawp.

Beiseina sang tak nena an lakluh, mahse beisei phak lo, a thusawi avanga sawisel hlawh Lukaku-a'n Blues tan tun season inelna hrang hrangah goal riat a khung tling ta chiah a, boruak duhawm lo a neih hnua goal a khung leh hi chanchin ṭha a ni ang.

Chak lo mah se Chesterfield tan Stamford Bridge-a inkhelh kha lawmna tur a ni. English football league san dan indawta pangana an nih avangin EPL club zingah pawh a langsar Chelsea hmachhawn kha player leh fans an lawm tih a takin a lang a ni.

FA Cup - Third Round Results
Swindon Town 1 - 4 Manchester City
Mansfield Town 2 - 3 Middlesbrough
Coventry City 1 - 0 Derby County
Burnley 1 - 2 Huddersfield Town
Hartlepool United 2 - 1 Blackpool
Bristol City 0 - 1 Fulham
Millwall 1 - 2 Crystal Palace
Boreham Wood 2 - 0 AFC Wimbledon
West Brom 1 - 2 Brighton & Hove
Kidderminster Harriers 2 - 1 Reading
Leicester City 4 - 1 Watford
Port Vale 1 - 4 Brentford
Wigan Athletic 3 - 2 Blackburn Rovers
Newcastle United 0 - 1 Cambridge United
Barnsley 5 - 4 Barrow
Peterborough United 2 - 1 Bristol Rovers
Queens Park Rangers 1 - 1 Rotherham United
Swansea City 2 - 3 Southampton
Chelsea 5 - 1 Chesterfield
Hull City 2 - 3 Everton
Birmingham City 0 - 1 Plymouth Argyle
Yeovil Town 1 - 3 AFC Bournemouth