Barty a champion nghal

Tennis season an ṭan chauh a, world number 1 Ashleigh Barty chuan nomawi a chawi leh nghal. Australian nula hian nimin khan Elena Rybakina hnehin Adelaide International title a la.

Nikum September thlaa neih US Open hnuah tun ṭum hi Barty inkhelh lehna hmasa a ni a, buaina a nei lem lo. A khingpui lakah hian 6-3, 6-2 a hnehna changin season bul a ṭan fuh hle.

January 17 aṭangin Australian Open khelh a ni dawn. Grand Slam inbuatsaihnaah hian Emma Raducanu pawh a inlan dawn, hliam vangin French Open champion hlui Iga Swiatek erawh a inlan thei dawn lo.

Barty tan hun ṭha a inherchhuah lai hian Naomi Osaka erawh a inhnukdawk. Japanese star hi Melbourne Summer Set-ah a inlan a, semifinal hial thleng mah se a pum a nat avangin a inkhel zui thei lo.

Grand Slam vawi li champion tawh Osaka hian a zawn lutuka match khelh chu a zawh loh thu a sawi a, Australian Open erawh harsatna nei loa khel thei tura beisei a ni thung.