Barca-in Torres an la ziaklut thei lo

Nikum December thla tawp khan Barcelona-in Manchester City aṭanga Ferran Torres an lakluh thu puang tawh mah se Catalan club hian tun thlengin Spanish forward hi an la ziaklut thei lo.

Barca hian pound maktaduai 46.3-in kum 21 mi Torres hi an lalut a, amaherawhchu sum lama harsatna tawk Catalan club hian an la chhawr thei lo.

Granada nena an inhnehtawk zawhah Xavi chuan, "Ferran kan la ziaklut lo. Ziaklut ta reng pawh ni ila, Covid-19 hri a kai avangin Granada nen chhawr theih a la ni lo," tiin a sawi.

Barcelona director Mateu Alemany chuan, "Loan hmangin Aston Villa-ah Philippe Coutinho chhuah mah ila Ferrán Torres kan la ziaklut thei lo. Ferran kan ziahluh theih nan ngawrh takin hma kan la mek," tiin a sawi.

La Liga-ah hian club tin tan player hlawha sum an pek theih chin bi tuk a ni a, Real Madrid-in euro maktaduai 739.2 an sen theih laiin Barcelona hian euro maktaduai 97.9 chauh an seng thei. Season ṭan dawn pawh khan an player tharte an ziahluh theih nan Gerard Pique, Sergio Busquets leh Jordi Alba ten an hlawh an tihniam tawh a ni.