Zanin 1:25-ah Man United vs Aston Villa

FA Cup third round-ah zanin dar 1:25 hian Manchester United-in Old Trafford-ah Steven Gerrard-a enkawl Aston Villa an mikhual dawn. Kumin FA Cup third round-ah replay a awm loh avangin inkhel a hmuhnawm sawt ang.

Nikum September thla khan Aston Villa hian Old Trafford luhchhuahin Kortney House goal hmangin Man United hi 1-0 in an hneh. Amaherawhchu tun season Premier League-a an intawn ṭum hian manager hi Ole Gunnar Solskjaer leh Dean Smith te an ni.

Tun ṭumah erawh Man United-in Solskjaer thlak nan Ralf Rangnick an lalut a, German manager leh English club te hi tun thleng chuan an la inkawp rem lo. Sky Sports-in a tarlan danin Man United player ṭhenkhatin Rangnick hnuaiah an khelh dan 4-2-2-2 formation leh pressing game khelh an harsat.

Man United hian an match hnuhnung berah Wolves an hneh lo a, Villa nena an inkhel tur hi insiamṭhatna remchang a ni. Kum 63 mi Rangnick chuan, "England-ah hian club tam zawkin khelh dan nghet an nei a, chutihrualin club ṭhenkhat chu defender pathum aṭangin paliah an insawn a, pali aṭanga pathuma insawn an awm bawk.

"Julien Nagelsmann enkawl team Bayern emaw nikuma a enkawl RB Leipzig kan thlir chuan defender pali an hmang a, an khelh laiin a ṭul danin pathumah an insawn. Kan team pawh hi an theihna kan thlir chuan defender pathum chhawr thei turin theihna kan nei," tiin an khelh dan thlak thei dinhmuna an din thu a sawi.

Man United tana chanchin lawmawm erawh Victor Lindelof a dam tawh a, Harry Maguire pawh dam hman thei dinhmunah a ding. Luke Shaw leh Scott McTominay te Aston Villa nen January 15, Inrinni zana an inkhelh hunah hrem vangin chhawr theih an ni dawn lo a, FA Cup-ah erawh chhawr theih an ni ang.

Aston Villa lamin Barce-lona aṭangin loan hmangin Philippe Coutinho an lalut a, Brazilian midfielder hi a la inlan thei dawn lo. Villa-in an match hnuhnung berah Brentford an hneh lo a, hemi ṭuma khel lo defender pawimawh Tyrone Mings a chhawr theih dawn.

Inkhel tingaihnawmtu tur tak erawh Villa manager Steven Gerrard a ni a, Liverpool legend hi Man United ṭantu ten an hre chiang. Gerrard-a enkawl Villa laka Man United an chak lo a nih chuan Rangnick sawiselna a ri ring sawt dawn.

Rangnick hian a player chhawr theih zinga ṭha thei ang bera player a thlan tur thu a sawi a, Gerrard -te pawh inhliam vang leh AFCON khelh vanga zin Trezeguet leh Bertrand Traore te tel loa an ṭhat dan berin an khel ve bawk ang.