Best FIFA Awards 2021 ; Messi, Lewy & Salah - tu nge thiam ber?

Football khawvela mimal chawimawina ngaihhlut hlawh ber pawl Best FIFA Awards 2021 chu January 17-ah sem chhuah a ni dawn a, ngaihven hlawh ber Best FIFA Men's Player lawmman dawng thei turin Lionel Messi, Robert Lewandowski leh Mohamed Salah chu a sang pathum an ni.

FIFPRO World XI-a lang thei tur hming chhawpchhuah 23 zingah Salah lang phak lo mah se player ṭha ber ni tura chhawpchhuah pathum zingah a lang a, Egyptian forward a nui ve leh thei tawh ang.

Coach ṭha ber chawimawina dawng turin Manchester City boss Pep Guardiola, Italy coach Roberto Mancini leh Chelsea manager Thomas Tuchel hming chhawpchhuah a ni a, dawng tur ber hriatthiam a harsa hle.

Goal mawi ber chawimawina dawng ṭhin, FIFA Puskas award dawng thei zingah Erik Lamela hming chhawpchhuah a ni a, AS Roma forward hian Tottenham Hotspur tana a khelh laiin Arsenal lakah rabona hmangin goal mawi bik a khung.

Messi mawlh hi
Barcelona aṭanga Paris Saint-Germain pantu Lionel Messi hi mipui mit fukna a ni leh dawn. Kum 34 mi forward hian PSG a pan hnuah beisei ang takin a la khel chhuak lo - league match 11 a khelhah goal khat chiah a la khung!

Argentine striker hian Champions League match nga a khelhah goal nga a khung thung a, tun season-ah goal ruk chiah a la khung tihna a ni - Messi nen a inhmeh lo hle.

Mahse, Messi hian season hmasa khan Barca tan match 47-ah goal 38 a khung a, Copa del Rey nomawi a chawi bawk. Hei aia a buk tirittu erawh Copa America-a Argentina a champion pui chu a ni a, top scorer (4 goals) a nih bakah best player atan thlan a ni bawk.

Kum 2021 chhung khan ram tan match 16 khelin goal kua a khung a, Ballon d'Or 2021 award pek a ni tawh bawk - a vawi sarih dawnna a ni a, record a ni. Best FIFA Men's Player atan thlan a nih pawhin mak ti suh.

Lewy & Salah
Ballon d'Or chawimawina a dawn loh avangin tam takin Lewy an vuipui a, Bayern Munich striker hian season hmasa khan inelna hrang hrangah match 40 khelin goal 48 a khung a, tun season-ah match 26 khelin goal 31 a khung leh der tawh!

Polish striker hian Bundesliga nomawi a chawi a, kum 2020 khan Best FIFA Men's Player atan thlan a ni a, nikuma Ballon d'Or chawimawina pek a ni lo erawh vuipuitu an tam hle.

Football ngainatu zingah Salah hming inhrilh nawn a ngai lo. Kum 29 mi striker hian season hmasa khan match 51-ah goal 31 a khung a, tun season-ah match 26 khelin goal 23 a khung leh der tawh bawk.

Egyptian King hming lem an pek forward buk tirit lotu erawh season hmasa khan Liverpool tan nomawi chawi a nei miah lo - khawvela league lar bera chhal ngam Premier League-ah goal 16 khung tawhin top scorer a ni mek a, hei erawh en kan luih a harsa ang.

Coach ṭha ber?
Pep Guardiola-a'n Premier League a pan hnuah harsatna a tawk lo a, khawvela league harsa ber pawlah hian season nga chhungin vawi thum a champion hman a, season hmasa pawh khan champion nomawi a chawi.

Tun season-ah pawh Pep-a'n Premier League-ah hneh takin hma a hruai fal pui a, Spanish manager hian he chawimawina hi a dawng a nih pawhin a mak lo ang - chutihrual chuan Thomas Tuchel hming theihnghilh loh a ṭha.

German coach hian season laihawlah club tluchhe mek Chelsea a zawm a, Stamford Bridge chim mek chu din thar lehin Champions League nomawi a chawipui a, European football-a team ṭha ber pawl an ni leh tawh.

Italy-a Roberto Mancini hnathawh hi engtikahmah sawi nep theih a ni dawn lo. Kumin World Cup playoff khelh la hmabak mah se European champion ni tura Italy a din dan chu ngaihnawm a tling a, football khawvelin a sawi nawn fo ang.

A chhehvel
Best FIFA Football Awards chawimawina dawng tur hi journalist, national team coach, national team captain leh fan ten an thlan a ni a, group tin hian 25% ṭheuh vote an nei - December 11 khan fans tana vote thlak hun hi a tawp tawh.

Award sem zanah hian FIFPro World XI pawh puan a ni dawn a, short list zingah Salah a tel loh avangin Best FIFA Men's Player -ah thlang si se, FIFPro thil thlan hi a ti khingbai khawpin a rinawm.

Best FIFA Men's Player dawng thei zingah Cristiano Ronaldo hming a lang lo a, Manchester United forward hian uai thlak lam a pan ve ṭan ta tih a lang - lung a tileng nghal ruih mai.

Ronaldo bakah Karim Benzema, Jorginho, N'Golo Kante, Kevin De Bruyne, Kylian Mbappe, Neymar leh Erling Haaland te chu top three-a lang lo langsar an ni a, Chelsea midfielder Jorginho hi UEFA Men's Player of the Year ni lai a ni.

Best FIFA Awards 2021
Hming Ram/Club
Best women's player
Jennifer Hermoso (Spain/Barcelona)
Sam Kerr (Australia/Chelsea)
Alexia Putellas (Spain/Barcelona)

Best men's player
Robert Lewandowski Poland/Bayern Munich)
Lionel Messi (Argentina/Barca/PSG)
Mohamed Salah (Egypt/Liverpool)

Best women's coach
Lluis Cortes (Spain/Barcelona)
Emma Hayes (England/Chelsea)
Sarina Wiegman (Netherlands/Dutch national team/English national team)

Best men's coach
Pep Guardiola (Spain/Manchester City)
Roberto Mancini (Italy/Italian national team)
Thomas Tuchel (Germany/Chelsea)

Best women's goalkeeper
Ann-Katrin Berger (Germany/Chelsea)
Christiane Endler (Chile/Paris Saint-Germain/Lyon)
Stephanie Labbe (Canada/FC Rosengard/Paris Saint-Germain)

Best men's goalkeeper
Gianluigi Donnarumma (Italy/AC Milan/Paris Saint-Germain)
Edouard Mendy (Senegal/Chelsea)
Manuel Neuer (Germany/Bayern Munich)

FIFA Puskas Award
Erik Lamela Tottenham (v Arsenal, 14 March)
Patrik Schick Czech Republic (v Scotland, 14 June)
Mehdi Taremi Porto (v Chelsea, 13 April)