Benzema hoin Real Madrid an kang zel

Karim Benzema-a'n striker ṭha bik a nihzia a lantirna inkhelah Real Madrid chuan Valencia 4-1 in an hneh. Carlo Ancelotti naute hian La Liga table-ah point riat zetin hma an hruai fal, mahse pahnihna Sevilla aiin match hnihin an khel hnem zawk.

Inrinni zan La Liga inkhel dangah Barcelona chu Granada nen 1-1 in an inhnehtawk. Xavi naute hian hun tawp dawna goal an chhuah avangin point hnih an hloh tia sawi theih a ni, chutih rualin tlarhma lama an hriam tawk lo an tuar.

Goal 300
Santiago Bernabeu Stadium-a inkhelah Real lamin chawlhlawk hma deuh lawkin penalty an hmu a, striker Benzema-a'n Spanish club lian tana a goal 300 nan a khung; inkhel chawhnu lamah Vinicius Junior-a'n goal hnih a khung bakah Benzema bawkin a khung belh.

Mikhual Valencia lamin Goncalo Guedes hmangin goal khat an sut ṭhen a, awmzia erawh a nei phak lo. Real hian league match an khelh hnuhnung 27-ah tlawm an nei lo a, hmahruaitu nih hi an phu hle.

Kum 33 mi Benzema-a'n Real tan match 584 a khelh aṭangin goal 301 a khung tling ta. Spanish club lian tana goal khung hnem lamah Cristiano Ronaldo (450 goals), Raul (323) leh Alfredo Di Stefano (308) te chauh tluk loh a nei.

France international Benzema chuan, "Real Madrid hi ka ngaihdan chuan khawvela club ropui ber a ni a, club lian leh ropui tana hetiang zat goal ka khung thei hi ka lawm hle. Getafe lakah kan chesual zauh a, chumi hnua kan thawh chhuah dan hin min ti lawm bawk," tiin a sawi.

Alves a inlan
Dani Alves-a'n Barcelona tan league match a khelh ve leh ta a, kum 2016 hnua La Liga match a khelh lehna hmasa berah a mikhual lem lo. Minute 57-naah Luuk de Jong-a'n goal a khung, a siamsaktu chu Alves a ni.

Catalan club hi an ṭang tluan zo lo. Minute 79-naah Gavi chu yellow card pahnihna hmuh vangin hnawh chhuah niin, player tlem zawk an nih hnuah goal an chhuah - Antonio Puertas goal hmangin Granada lamin point khat an hlawh chhuak.

Hamrik hnuhnung rik hma chiahin De Jong-a'n chakna goal tauh lutah a inngai. Mahse, video assistant referee (VAR) hman a nih hnuah a goal hi hnawlsak a ni. Xavi naute hian point 32 chauh an la neih avangin paruknaah an awm.

Nilaini zanah Barcelona hian match hautak an khel chhunzawm dawn. An hmelma leh elpui ni bawk Real Madrid chu Spanish Super Cup semifinal khel turin Nou Camp-ah an lo mikhual dawn. Xavi tan Barca a enkawl hnua El Clasico hmasa a ni dawn.