Covid-19 vanga buai Bayern an chak lo

Bundesliga-ah champion lai leh hmahruaitu Bayern Munich chuan Zirtawpni zanah an mikhual Borussia Monchengladbach chu 2-1 in an hneh lo. Allianz Arena-a inkhelah hian Bavarians-in Robert Lewandowski hmangin khung hmasa mah se Gladbach-in Florian Neuhaus leh Stefan Lainer te hmangin an lehthal.

Inkhel dangah Bayern elpha ber tura ngaih Borussia Dortmund-in Eintracht Frankfurt lamah goal hnih an chhuah hmasa chungin 3-2 in hnehna an chang. Deutsche Bank Park-ah Augsburg tan Rafael Maury-a'n first half-ah goal hnih a khung a, mikhual Dormtund-in second half-ah Thorgan Hazard, Jude Bellingham leh Mahmoud Dahoud hmangin an chhanglet.

Covid-19 vanga buaina
Bayern Munich-in hri leng vangin harsatna lian tak an tawk. Nikum November thla khan Joshua Kimmich chuan Covid-19 hri a kai avangin kum tawp lamah a inlan thei lo a, Germany international hi Gladbach nen an inhmachhawn ṭumin a rawn inlan thei chauh.

Kimmich rawn let hi chanchin lawmawm ni mah se Gladbach lakah hian player 12 an chhawr thei lo a, chung zinga pakua chu Covid-19 vanga a ni. Player khel thei lo zingah hian player pawimawh Manuel Neuer, Lucas Hernandez, Leon Goretzka, Leroy Sane, Alphonso Davies leh Kingsley Coman te pawh an tel.

Tlarhnung phuahchawp
Julian Nagelsmann-a'n loh theih loin first eleven a siksawi a ṭul a, Neuer a awm loh avangin Sven Ulreich-a'n goal a ven a ṭul. Kum 33 mi Ulreich hi Bayern second keeper ṭhin a ni a, season liam ta khan 2. Bundesliga club Hamburger-ah chhuakin tun season-ah a rawn kir a ni.

Tlarhnungah Kimmich, Benjamin Pavard, Niklas Sule leh Marcel Sabitzer te an awm a, Kimmich leh Sabitzer hi midfielder ni mah se right leh left back-ah awmtir an ni. Midfield-ah rawlthar duhawm Jamal Musiala leh kum 25 mi Marc Roca te an awm.

Tlarhmaa Lewandowski maltlat pui turin Serge Gnabry, Thomas Muller leh kum 19 mi Malik Tillman te an ni. Bench-ah player naupang rual an awm a, inkhel tidanglam thei tur khawpa tawnhriat nei ṭha an awm lo.

Mi thar Wanner
Bayern-in Gladbach an hneh ta lo a, amaherawhchu Nagelsmann-a tan lawmna tur a awm. Bench aṭangin kum 16 mi Paul Wanner leh kum 17 mi Lucas Copado te an lut a, German player ve ve an ni.

Midfielder Wanner hi kum 16 leh ni 15 mi chauh a ni a, Bayern tana Bundesliga-a inlan thei naupang ber a ni. Ke vei lama pet Wanner hian Dortmund forward Youssoufa Moukoko (kum 16 leh ni 1) chiah a tluk lo. Wanner leh Copado ten minute 15 chauh hun an neih avangin hming chherna turin hun an ngah lo. Copado hi Bayern sporting director Hasan Salihamidzic-a unaupa fa a ni thung.

Bayern Munich hian January 15, Inrinni zan dar 8:00-ah FC Cologne nen an inkhel leh ang. Cologne hian nizan khan Hertha Berlin an hmachhawn a, tun dinhmunah table-ah pakuanaah an awm mek.