Spurs-in Traore an dawr dawn

Tottenham Hotspur chuan Wolverhampton winger Adama Traore chu lakluh tumin an dawr dawn a, he thu buatsaih a nih lai hian official takin indawrna erawh a la awm rih lo thung.

Nipui lai khan Spurs hian Traore hi lakluh tumin an lo hel tawh a, khatihlaia Spurs coach kha Wolves-a Traore lo enkawl tawhtu Nuno Espirito Santo a ni.

Mahse, London club-in Nuno an thlak hnuah pawh Traore an la duh reng a, coach Antonio Conte chuan wing-back anga chhawr a chak nia sawi a ni - Italian coach hian Chelsea-ah Victor Moses chu hlawhtling takin wing back-ah a lo chher tawh.

Kum 25 mi Traoré hian Wolves-ah thla 18 dang cham turin contract a la nei mek a, contract thar a ziah duh rih loh avangin Premier League club tan hian a pan duh lama kal tir mai chu thutlukna fing ni tura ngaih a ni.

Wolves boss Bruno Lage chuan, "Pen khata hmasawn tum laia player neih ṭha ber hralh zel chuan a pen theih miah loh. A pawimawh ber chu kan neih sa hmanga inelna chhunzawm hi a ni a, mahse, transfer lian tham tak pakhat a lo lan chuan hnar a har hle bawk.

"A tawpah eng nge thleng dawn a sawi lawk theih loh a, club leh player tana ṭha tu ber ngaihtuah zel a ngai a ni," a ti a, Spain international hi an chân ngei dawn niin a lang.

Barcelona academy chhuak Traoré hian tun season-ah Wolves tan inelna hrang hrangah goal 20 a khung tawh a, goal khung emaw assist emaw a la nei rih lo.