MLS-a hlawh hnem ber tur Insigne

Napoli forward Lorenzo Insigne chu Major League Soccer chanchina player hlawh hnem ber a ni dawn. Kum 30 mi forward hian MLS club Toronto FC zawm turin inremna a neihpui a, nipui transfer-ah USA lam panin a puanthuah a tel zui ang.

Italy international hian kum li chhung atan contract a ziak a, kum khatah dollar maktaduai 15 a hlawh dawn - MLS-ah heti zat hlawh thei player an la awm ngai lo a, Zlatan Ibrahimovic-a'n LA Galaxy-ah season khata dollar maktaduai 7.2 hlawha hlawh hnem ber record a lo chelh reng tawh chu a khum dawn a ni.

Toronto president Bill Manning chuan, "Kan club tan chuan ni chhinchhiah tlak leh hriat reng tawh tur a ni. Lorenzo hi world class attacking player, a vanglai hun hmang mek a ni a, Italy tan European champion niin Napoli tan level sang taka a khel bawk," tiin Insigne an lalut thei chu a lawm thu a sawi.

Italy tan vawi 53 inlana goal 10 khungtu Insigne hian kum 15 mi lek a nih laiin Napoli hi a zawm a, loan-in a chhuak tih loh chu club dang tan a la khel lo - inelna hrang hrangah match 416 khelhsak tawhin goal 114 a khung tawh a, assist vawi 91 a nei a, kum 2019 aṭang khan club captain a ni bawk.

Napoli tana Coppa Italia (2) leh Supercoppa Italiana nomawi chawitu hian tun season-ah pawh inelna hrang hrangah match 19 khelin goal nga a khung a, assist vawi ruk a nei der tawh.

Insigne club thar tur Toronto hi American coach ṭha Bob Bradley chuan a enkawl mek a, Swansea City boss hlui chuan, "Amah mai ni lo, a ṭhiantea tana chance a siam theih dan hi a ropui.

"Rei tak a inkhel ka en tawh a, team tana inpe ṭhin player a ni tih ka hria. Theihnghilh loh tur thil duhawm thlen tir tura theihna nei reng a ni a, ani ang player hi chu en an châkawm ṭhin," a ti.

Toronto hi MLS Eastern Conference-ah an awm a, nikum khan playoff an inpetkai zo lo. February-ah season thar an ṭan dawn a, hetihrual hian Insigne erawhin Serie A season zawh hunah a zawm dawn chauh thung.