Mumbai an che fuh thei lo!

Zirtawpni zan Indian Super League inkhelah Mumbai City-in vawi 15 zet shot an nei chungin goal an khung thei lo a, East Bengal nen 0-0 in an inhnehtawk.

Mumbai City hi an match hnuhnung paliah an chak zo tawh lo - vawi hnih an tlawm a, vawi hnih an khingpui an inhnehtawkpui. Heti chung hian league table luah chhunzawm zel mah se he thuziak i chhiar meuh chuan hma an hruai tawh kher lo mai thei.

Nizan khan Kerala Blasters leh Hyderabad ten league match an khel a, he thu buatsaih a nih lai hian result kan hre hman lo - Hyderabad hian hnehna an chang a nih chuan Mumbai hi an tlan pel ang.

East Bengal tan player ṭhangduang Lalrinliana Hnamte chuan inkhel bul a ṭan a, Mumbai City lamah Lalengmawia'n (Apuia) bul a ṭan bawk - Mizo tlangval an intawn zanah chak zawk an awm lo.

Inrinni zan ISL inkhelah goal kan hmu dawn lo emaw kan ti hman a, mahse, Zirtawpni zan ang thoin 0-0 a tawpna chance a sang hle.

Mahse, hun tawp nan minute riat chauh a awm tawh tihah Jorge Ortiz chuan long-range striker hmangin Goa tan goal a rawn khung a, Chennaiyin tan comeback turin hun a tam tawk tawh lo.

Chennaiyin tan Jerry Lalrinzuala chuan inkhel bul a ṭan a, Lallianzuala Chhangte chu minute 71-naah luhtir ni ve bawk mah se goal a keng tel bik lo a, South Indian club-in kut ruakin khelmual an chhuahsan.

Tun season ISL-ah team tin an intiat tawk a, tun dinhmuna hmahruaitu Mumbai leh pasarihna Odisha inkarah point li chauh a awm a, Odisha hian match khatin an la khel tlem zui - playoff khelh phak tum inum boruak a ngaihnawm chho zel dawn.