Covid-19 in AFCON a dal dawn lo

Africa Cup of Nations chu nimin aṭangin Cameroon-ah khelh ṭan a ni a, vawiinah khelh chhunzawm a ni ang. Africa ramte tana football inelna sang berah hian Covid-19 vanga inhriatthiamna a awm dawn lo a, hri leng vanga khel thei lo team chu 2-0 a chak lohtir an ni dawn.

Confederation of African Football (CAF) chuan thuchhuah thar siamin Covid-19 vangin player 11 chauh chhawr tur an nei a, an player chhawr tur zingah goalkeeper an awm lo a nih pawhin inelna hi kaltlangpui tho tur a ni.

Africa ram football-a thuneitu sang ber AFC chuan thil thleng danglam bik ngaihtuah ngai a awm a nih chuan inelna buatsaihtuten an chungchang an ngaihtuah ang, tiin an ziak tel. Liverpool forward Mohamed Salah telna Egypt training camp chu hri lengin a nuai a, inelna neihna hmun tur Cameroon an pan tlai bakah training an ṭhulh phah bawk.

Pharoahs hi AFCON-ah vawi sarih champion tawhin nomawi chawi ngun ber an ni a, Inrinni khan Cameroon an thleng. Gabon team zingah player pahnihin Covid-19 an kai a, pakhat zawk hi Arsenal forward Pierre-Emerick Aubameyang a ni.

Zanin Inkhel Tur
Senegal 6:30 PM Zimbabwe
Guinea 9:30 PM Malawi
Morocco 9:30 PM Ghana
Comoros 12:30 PM Gabon

Group ṭhen dan
Group A : Cameroon, Burkina Faso, Ethiopia & Cape Verde
Group B : Senegal, Zimbabwe, Guinea & Malawi
Group C : Morocco, Ghana, Comoros & Gabon
Group D : Nigeria, Egypt, Sudan & Guinea-Bissau
Group E : Algeria, Sierra Leone, Equatorial Guinea & Ivory Coast
Group F : Tunisia, Mali, Mauritania & Gambia