Maguire a inhliam, Young a chhuak dawn

Manchester United defender Harry Maguire chu FA Cup-a Wolverhampton Wanderers nen an inkhelh ṭumin a khel bawrah hliam a tuar a, hun rei zawk a chawl dawn. United captain Ashley Young pawhin season tawpa a contract zawh hunah Inter Milan a zawm dawn.

Thawhlehni khan Ole Gunnar Solskjaer chuan, "Rei tak inhliam tur chu a ni lo," tiin Maguire a chungchang sawi mah se an beisei aiin a chawl rei dawn. England international defender hian Molineux Stadium an tlawh ṭumin minute 90 chhung a khel a, inkhelh banah erawh kal a harsat. Kum 26 mi defender hi a rawn let hun tur la hriat lo mah se an tuar dawn tih erawh a chiang.

United hian Maguire-a tel loin Man City chu League Cup semifinal first leg-ah 3-1 in an hneh lo a, hemi zawh hian Norwich City, Wolverhampton Wanderers (FA Cup), Liverpool, Burnley leh Man City (League Cup) te an hmachhawn dawn. Solskjaer hote hian hliam vangin defender Axel Tuanzebe, Eric Bailly, Marcos Rojo leh Timothy Fosu-Mensah te an chhawr thei tawh lo a, Chris Smalling-a'n loan-in Roma a zawm thung.

Man City an hmachhawn ṭuma tlarhnunga awm Victor Lindelof kawppui Phil Jones pawh match tawp lamah a inhliam. United-in kartawpa Norwich City an mikhual huna tlarhnung inrem dan tur hriat a châkawm ta hle.

United hian midfield-ah hliam vangin Paul Pogba leh Scott Mc Tominay te an chhawr thei lo bawk a, January transfer an hmang ṭangkai lo a nih chuan season thara Champions League khelh a harsa khawp ang.

Hetihlai hian captain Young chu United-in kum khat atan contract an zawrh tih thawm a, kum 34 mi defender hian a hnawl a rinawm. English player Young hi January-ah pawh chhuak thei ni mah se Solskjaer chuan, "Kan team chhiatna turin thutlukna kan siam thei lo. Transfer a awm a nih chuan kan team ṭhatna tur a ni ang," tiin January transfer-ah player lakluh an tum thu a sawi. Chutihrualin Young hi season tawp ruala a contract a tawp dawn avangin nipuiah Inter Milan hi zawm ngei tura ngaih a ni.