Lammual pan zan ; Chhinga Veng Vs Electric Veng

Zanin dar 7:00 hian LG Independence Cup semifinal-ah veng inṭhenawm - Chhinga Veng leh Electric Veng te an inkhel dawn.

Tun inelna chauh ni lo, tun season-a hneh loh la tawng lo pahnih champion lai Chhingcows leh MPL kaithar Electric Veng inhmachhawn tur hi club awmna veng mipui tan chuan en ngei tur a ni a, tualchhung football ngaina tan chuan Lammual panna tur inkhel a ni.

EFC ṭhatna thuruk!
Electric Veng FC-in MFA Super Cup khel turin an inpeih hman lo a, I Day Football-ah I League club Aizawl FC hnehin bul an ṭan a, mipui phurna nen ṭangkawpin an phur vanglai hun an thleng chho mek. MPL kaithar hian beisei loh an beisei ngam a, Chhinga Veng tan zuam chi an ni tawh lo.

Chhinga Veng coach Lalsangzuala Hmar chuan, "Electric Veng khel hi ka la en vek a; player-te, an formation te, an theihna te leh tehnical move-te dah ṭha ila, he team ṭhatna chu team pumpui hi inelna hmachhawn turin an inpeih. Mentally fit a nih tawh chinah chuan fimkhur a ngai a, kan khel sual a nih ngat chuan chak lo thei kan ni," tiin Vanglaini a hrilh.

A tawnhriat sawi chhunzawmin Sanga chuan, "Kum 2016 khan Chanmari ka enkawl a, Sawmfela leh MS-a te nei vekin semifinal-ah Ramhlun North kan hmachhawn. Anni khan hlauhthawn tur an nei lo a, player inenchhin nan an hmang a, amaherawhchu semifinal-ah kan tlak phah. Electric Veng pawh hian pressure an nei lo," tiin a sawi.

Electric Veng hian tun inelnaah David Lalchhuanawma chu striker-ah chhawrin an tifuh tih a lang a, Salem Veng tlangval hian goal hnih a khung tawh.

EFC tan an veng tlangval te an che ṭha a; goal hnih khung tawh Vanlalhmangaiha chu inkhel tidanglam thei tur khawpin a inringtawk a, midfield-ah

C. Laldinmawia leh Vanlalremkima te'n inkhel kalhmang an thlak thei a, final an thleng a nih pawhin thil mak tih tur a ni lo.

Champion lai nge nge
Chhinga Vengin season liam ta khan MFA Super Cup, I Day Football leh Mizoram Premier League nomawi an chawi vek a, an tihfuh a ni lo tih chu mitin hriat a ni.

Tun season-ah an player ṭha ṭhenkhat chhuak mah se coach Lalsangzuala Hmar an la chelh avangin champion rilru an la pu reng.

Sanga hote hian MFA Super Cup nomawi an humhim bakah I Day Football group stage-a khingpui hneh vek thei awm chhun an ni.

Electric Veng manager Lalchhanhima chuan, "Chhinga Veng hian squad an nei ṭha ber a, coach ṭha ber an kawl bawk. Kan zam phah lo a, hetiang team ṭha hneh thei dinhmuna kan ding hi kan lawm. Theihtawp chhuahin final thlen ngei kan tum ang," tiin an khingpui ṭhatna chu infuihna ṭha a nih thu a sawi.

Mipui lam hi...
Electric Veng manager chuan, "Mipuiin min phur pui a, veng pum kan phur. Veng pumin Lammual kan pan ang," tiin mipui puihna nen an ṭhenawmte hneh an tum thu a sawi.

Chhinga Vengin Sanga hnuaiah nomawi pali an chawi tawh a, an la duhtawk lo. Zanin hi hming ṭhat inchuhna tur a ni a, Chhinga Veng tan Electric Veng laka chak loh hi mualphona a nih theih avangin ṭantu an nei ṭha ang.

Electric Veng beiseina Pa-Dinga freekick
CYMA Football 1995-ah Electric Vengin golden goal-a Pa-Dinga freekick hmangin Chhinga Veng an hneh a, quarter final an lut. Electric Veng mipui ṭhahnem takin Pa-Dinga freekick an la mitthla thei dawn a, zanin an inkhelh turah pawh infuihna ṭha tak a ni ngei ang.