BCCI member thar Cricket Association of Mizoram

Cricket Association of Mizoram (CAM) chuan nimin khan Board of Control for Cricket in India (BCCI) hnuaia full member thar a nih thu Supreme Court-in August 9, Ningania a nemngheh chungchangah thuthar thehdarhtute an kawm.

CAM president Lal Thanhawla chuan, "Kan hruaitu hmasa ten harsa tak kara an lo beih tawh, kan lo suangtuah ṭhin chu a takin kan thleng," tiin a sawi a, CAM chu 1992-a din a nih thu leh, BCCI member ni tura an beihna kawngah beidawn lek lek chang an neih ṭhin thu a sawi tel bawk.

North East aṭangin Assam leh Tripura te chu BCCI full member ni sa an ni a, Mizoram hian affiliate (kum nga) leh associate (kum nga) bawh kânin full member nihna hi a nei a, an rual hian NE state dangte pawh member ngheta puan an ni bawk - tunah hian BCCI full member 34 an awm ta a, state ṭhenkhatah chuan BCCI member pakhat aia tam pawh an awm.

Cricket Association of Mizoram hian inelna an hmachhawn theih apiangah tel an tum a, tun hma lama an neih ngai loh hmeichhe team pawh an kal pui tawh. Mipa senior team inelna hmasa atan September 19 aṭanga khelh turVijay Hazare Trophy-ah an inlan nghal dawn a; November 1 aṭan tur Ranji Trophy an khel zui bawk ang.

CAM hrauitute chuan hun rei tak aṭanga inbuatsaihna an kalpui tawh avangin inelna hmachhawn tura an inpeih hman tur thu an sawi a, CAM president Hawla chuan, "Eng inelna pawh hmachhawn turin kan inpeih, kan khelmual hi international level tura ruahman a ni a, tunah hian a pitch leh thildang tlem siamṭhat deuhin hman mai theih tur a ni," tiin a sawi.

Ramhlun Sports Complex leh Durtlang khelmualah CAM hian training a kalpui mek a, tualchhung coach ten senior bakah kum bithliah (U-23, 19&16) khel thei tur player chherna hun an nei mek a ni. Mizoram hian inelna an hmachhawn hunah chuan Suaka Cricket Stadium, Sihmuiah leh Assam-ah home match a khelh a ngai dawn a ni.

Supreme Court thu chhuak tharah chuan BCCI leh state chhung hruaitu (OB) atan minister emaw sorkar hnathawk an ni thei lo ang, tih a ni. CAM kal chhoh dan tur sawiin president chuan, "Full member kan nih aṭanga ni 30 chhung hi insiamremna hun kan nei a, chumi chhung chuan kan inchingfel hman ang," a ti.

Tun dinhmunah Cricket Association of Mizoram hnuaiah hian affiliated club 30 an awm mek a, heng zinga club 29 te chu Mizo player khelhna a ni.