Alisson a insiamrem rang - Klopp

Liverpool manager Jurgen Klopp chuan AS Roma aṭanga an lakluh goalkeeper Alisson chuan Anfield a pan hnuah a insiamrem nghal mai thu a sawi a, Pathianni zan dar 6:00 a West Ham an mikhual hunah Brazil international hi inlan nghal tura beisei a ni.

Pound maktaduai 66.7 man Alisson chungchang sawiin Klopp chuan, "Alisson hi goalkeeper tura piang a ni. A bik takin Premier League-ah chuan keeper-te hi box chhungah inringtawk leh chiai loin an awm tur a ni a, a hun leh hmun dik takah chetna hun an hre tur a ni bawk. Kan duh ang hi Alission-ah hian a awm a, kan hnenah kar hnih lek hun a hman chhungin a insiamrem rang hle a ni," tiin a sawi.

Reds hian tun nipui bazar chhungin Alisson bakah Naby Keita, Fabinho leh Xherdan Shaqiri te an lalut tawh a, English club-te tan bazar khar a nih tawh avangin January thla hma chuan player thar an nei tawh dawn lo. Hetih lai hian Europe club dangten player an la lei thei; German manager chuan, "Kan lalut thei lo a ni mai a, kan la hralh thei. Mahse, EPL club lakah chuan kan hralh tawh lo ang," a ti.

Thu thiam Klopp

Jurgen Klopp chuan film lar tak Rocky Balboa nen Liverpool chu a tehkhin a, hlawhtlinna chang turin thawhrimna an la mamawh thu sawi.

German coach Klopp chuan, "Engtin nge champion kan sawi ngam ang. Champion lai chu Man City an ni a, player an chan loh bakah Rihad Mahrez an lalut a, an player thar hian an team a tichhe hauh lo ang. Community Shield-a Chelsea nena an inkhel kha kan thlir a, an la ṭha reng a ni," tiin anni aiin Pep Guardiola enkawl City chu champion tura rinkai zawk an nih thu a sawi.

Liverpool boss chuan sawi chhunzawmin, "Kan team hi Rocky Balboa kan la ni reng a, Ivan Drago kan ni lo. Kan elpuite aiin hlawhtlinna chang turin thawhrimna kan mamawh. Season liam ta khan engmah kan thleng lo, final chu kan thleng ngei a, kuminah kan thleng nawn a nih chuan chak kan tum tawh tur a ni. League-ah pawh hemi rilru tho hi kan pu tur a ni," tiin chak tura beih hram hram an mamawh thu a sawi.