Vawiin aṭangin Challenger Tennis League

Mizoram chhunga tennis inelna sang ber tur Mizoram Tennis Association (MTA) buatsaih 1st Aijal Club Challenger Tennis League chu vawiin hian Aizawl Tennis Club court-ah khelh ṭan a ni dawn.

Inelnaah hian team panga awmin vawiin chawhma dar 11:00-ah ATC Love All leh Aijal Club Bulls an inkhel ang a, dar 2:00-ah Aijal Acers leh K-12 Acers te inkhel lehin tlai dar 5:00-ah Zarkawt Xenons leh ATC Love All te an inkhel leh ang.

Inelnaah hian category paruk a awm a, chungte chu men's singles, ladies singles, junior singles (Under 18), 35+ doubles, open doubles leh mixed doubles te a ni a. Team tin hi vawi khat ṭheuh an inkhel chhuak a, category khat hi set khat zel niin game ruk la hmasa zawk zawk chu chak zawk a ni ang.

August 15 hian match hnuhnung ber khelh a ni dawn a, champion team chu inelna pumpuia game la hnem ber a ni dawn. Hei vang hian category zawng zawng leh match zawng zawng a pawimawh vek dawn tihna a ni.

Tun ṭum inelnaah hian state pawn aṭangin player chahluh a ni a. All India Civil Service Sports a kum 15 a zawn a champion thei Jagdish Tanwar a tel a, ani hi India 35+ team zinga mi a ni a. Inelnaah hian India junior player ṭha Sanket Tomar, India hmeichhe player beiseiawm ber pawl US college a scholarship hmu pha Damini Hoon, world ranking a number 984 ni pha Jayesh Pungliya, India women number 3 pawh ni tawh Shweta Rana, India mipa ranking number 36 ni leh junior top 10 ni ṭhin Amit Beniwal, North East a mipa tennis khel thiam bera ngaih Vilasiar Khate te an inlan dawn bawk. Mizo player chhuanvawr Basil Khuma, K. Lalrinawma, Innocent Lalrindika, Lalhmachhuana leh Ramengmawia te thiamna enchhinna hun remchang a ni ang.