Transfer tawp niah Everton an che na!

Premier League transfer tawp niah Everton an che na a, nizan khan Barcelona defender Yerry Mina, midfielder Andre Gomes leh Brazilian winger Bernard te an lalut!

Manchester United pawhin an duh nia an sawi Mina hi pound maktaduai 27.19-in an lalut a, a contract ang chuan an duh chuan an la let leh thei ang. Gomes hi season khat chhung atan pound maktaduai hnihin loan-in an hawh a, Bernard hi free transfer-a an lakluh a ni thung.

Merseyside club hian nizana player pathum an lakluh hma hian Richarlison chu pound maktaduai 50 thlenga a man sang chho thei turin an lalut a, Barcelona aṭangin Lucas Digne an lalut bawk. Merseyside club hian player thar panga an neih zinga pathum chu Barca aṭanga an lakluh tihna a ni!

Tu nge Mina?

Kum 23 mi defender hi Barcelona chuan January khan Brazilian club Palmeiras aṭangin pound maktaduai 10.44-in an lalut a, hmun erawh a chang phak meuh lo. World Cup-ah ram tan player pawimawh niin vawithum ngawt goal a tauh lut a, club hrawl tak takin an rim karah Everton a pan ta zawk.

Mina chuan, "He club hian hlawhtlinna chhar an duh tih hriat hian minti phur takzet a, ka tan chuan tun hi hun duhawm chu a ni," tiin a hun ṭha neih bawhpelh a duh loh thu a sawi.

Everton boss Marco Silva chuan, "Player, a khelh dan hrechiang em em leh ball thiam tak a ni. Defensive-ah khawng taka ding turin kan beisei a, chutihrual chuan set piece-ah kan chhawr ṭangkai theih ka beisei," a ti a, Colombia tana a goal tauh luh kha a lo la theihnghilh sak bik lo!

Hei le Gomes...

Euro 2016-a Portugal an champion ṭum khan Gomes hi squad-ah a tel a, kumin World Cup-ah erawh hruai zingah a tel ve lo. 2016-17 season ṭan dawn khan Valencia aṭangin Barca a pan a, match 78 khelin goal thum a khung.

Barcelona-a a season hmasa pahnihah hian beisei a phak lo a, loan hiala chhuahtir a ngaih phah ta - mahse Valencia tana a khelh laiin a ṭhatzia a pholang tawh a, Premier League-ah a zam lo ang.

Gomes chuan, "Marco Silva hi Portugal-ah chuan mi zawng zawngin an hria a, a duhdan leh ruahmanna hi mipui ngainat chi a ni a, Everton tana kan thawkdun thei tur hi ka lawm takzet a ni," a ti.

Hmana mi!

Kum 25 mi winger Bernard hi player beiseiawm pawla an sawi ṭhin kha a ni a, rin ang erawh a ni lo. Brazilian club ṭha Atletico Mineiro aṭanga a career ṭanin 2013 khan Shakhtar Donetsk a zawm a, Ukrainian club-ah hian a contract a zawh tawh avangin Everton hi a free-in a pan.

Brazil tana vawi 14 inlan tawh winger chuan, "Ka thil hriat zozai avangin Everton hi ka zawm a ni. Marco Silva nen kan inbia a, kan inbiak zawhah chuan he hmun pan kha ka duh a ni," tiin a sawi.

Bernard hian Ukraine-ah khan league nomawi ringawt pawh vawi thum a dawng hman a, a tawnhriat a ṭangkai dawn. Mineiro chu 2013 khan Copa Libertadores-ah a champion pui tawh bawk - Everton-in Champions League khelh phak an tum niin a lang a, Bernard hi an zinkawngah a pawimawh khawp ang.