Arsenal mualah champion lai Man City

Premier League season thar an ṭan a, Pathianni zan dar 8:30 hian Emirates Stadium-ah inkhel hmuhnawm leh pawimawh a awm nghal dawn. Champion lai Manchester City chu manager thar Unai Emery enkawl Arsenal nen an inhmachhawn ang.

Pep Guardiola-a'n Man City a enkawl hnuah season hawn nan Sunderland leh Brighton te a hneh tawh a, an khingpui tur Arsenal hi tun hnai season hniha an match hmasa bera goal sarih zet chhuah an ni thung. Mahse, Gunners hi Arsene Wenger-a'n a chhuahsan tawh a, beiseina thar nena inlan tur an ni.

Club pahnihte hi Premier League bikah vawi 42 an intawng tawh a, Gunners-in vawi 23 hnehna chang tawhin ṭum kua an chak lo thung. Chutih rualin tun hnai thlir chuan City an chungnung, Citizens hian an intawn hnuhnung pangaah chak loh an nei miah lo.

Arsenal hmel thar

Season 22 hun a hman hnuah Wenger-a'n Arsenal a chhuahsan a, amah thlaktu Emery-a'n player thar panga la mah se French manager chhuak ta hi North London club tan chuan 'Transfer lian ber' anga sawi theih a ni ang.

A zawna Champions League an khelh phak loh avangin Arsenal-in insiamṭhat an mamawh takzet, an neih sa thuam chak turin - Lucas Torreira, Bernd Leno, Sokratis Papastathopoulos, Matteo Guendouz leh Stephan Lichtsteiner te an lalut - tlarhnung lama hman chi vek an ni.

England international Jack Wilshere a chhuak thung a, hliam vanga pre season match hnuhnung ber khel lo Aaron Ramsey chuan training a zawm leh tawh. Hliam vanga chawl lai Laurent Koscielny leh Sead Kolasinac te erawh an khel thei dawn lo; a dang zawng chuan Man City an hmachhawn thei dawn.

Engtin nge niang?

Unai Emery-a'n pre season lamah Pierre-Emerick Aubameyang leh Alexandre Lacazette te tlarhma laiah a khelh chhawk tir a, goal li ve ve an nei thei. City lakah striker pahnih hi a luhrual tir a nih chuan France international hi a laiah awmin, Dortmund striker hlui Aubameyang chu khelmual sir vei lamah zalenna zau zawk pek a nih a rinawm.

Germany international hlui Mesut Ozil chu tlarhma a mite thlawp tur a ni dawn a, World Cup khel hah ve lo mah se Ramsey erawh a la 'risk' lo mai thei. Ramsey a awm loh chuan Granit Xhaka leh Lucas Torreira te an din dun a ngaih hmel, pre season lama khel ṭha tak Henrikh Mkhitaryan leh Matteo Guendouzi tan hmun siamsak an nih pawhin a mak lo ang.

Koscielny awm loh vangin Shkodran Mustafi mawhphurhna a sang zual ngeiin a rinawm, Germany centre back hian Sokratis Papastathopoulos a dinpui a rinawm. Hector Bellerin nge Stephan Lichtsteiner lut tur zawk hriatthiam a har a, Petr Cech aiah Bernd Leno hmel kan hmu a nih pawhin a mak lo ang - player lut tur hriatlawk a ni lo a, hriat theih erawh chu Arsenal hmel thar kan hmu dawn tih a ni.

Pep-a City

Point hmu hnem leh goal khung hnem record siam chunga Premier League nomawi chawi thei chu Manchester City an ni a, Pep Guardiola naute hian an elpui tur a ngaih Chelsea lakah 'football mawi' hmanga hnehna changin Community Shield an chawi leh der tawh.

Spanish manager hian season hmasa khan player a siksawi nasa a, season chawhnu lamah erawh hman rim bik chu a nei. World Cup khelh vanga training zawm har an awm a, an chawlh hun pawt tawi an awm bawk. Raheem Sterling leh Kevin De Bruyne te chu team zawm tlai fal an nih avangin Gunners lakah inkhel bul an la ṭan kher lo ang.

Sergio Aguero-a'n Blues lakah goal hnih khungin striker hriam a nih zia kan hmu leh tawh, a thachhang dawl turin Gabriel Jesus a inpeih tawh bawk. Barcelona keeper hlui Claudio Bravo chuan Brazil international Ederson lakah a hmun a hloh nawn leh ngei dawn bawk.

City midfield hi season hmasa ang bawkin an hmuhnawm leh ang, Bernardo Silva, David Silva leh Leroy Sane te mawina belhchhah turin pound maktaduai 60 man Riyad Mahrez an neih belh bawk; Arsenal lakah an midfielder ball thiam rual an che fuh leh a nih chuan goal khung an harsat dawn lo a, Gunners tan City midfielder-te dan hi point hmuh theihna kawng pawimawh a ni ang.

Fixtures
Nizan Inkhel (Result kan hre hman lo)
Manchester United 12:30 AM Leicester City
Zanin Inkhel Tur
Newcastle United 5:00 PM Tottenham Hotspur
AFC Bournemouth 7:30 PM Cardiff City
Fulham 7:30 PM Crystal Palace
Huddersfield Town 7:30 PM Chelsea
Watford 7:30 PM Brighton & Hove
Wolverhampton 10:00 PM Everton
August 12, Pathianni
Liverpool 6:00 PM West Ham United
Southampton 6:00 PM Burnley
Arsenal 8:30 PM Manchester City