Leicester tan Vardy a rinawm

Premier League club Leicester City striker Jamie Vardy chuan Foxes tan rinawmna thu a tiam nawn a, kum 2016 Premier League champion-ah hian kum li dang a khel dawn.

Kum 31 mi striker chuan, "Mi zawng zawngin he club tana khelh ka ngaihhlut zia an hria a, Leicester tana kum li dang ka khel thei tur hi ka lawm takzet a ni," a ti.

England international hian non-league club Fleetwood Town aṭangin kum 2012 khan Foxes hi a pan a, match 234-a inkhelhah goal 89 a khung sak.

Kum 2016-a Premier League nomawi an chawi khan goal 24 a khung sak a, season hman zawh takah khan inelna hrang hrangah match 42 khelin goal 23 a khung bawk.

Foxes hian Vardy contract thar an ziahpui thu an puan hma hian Freiburg aṭangin defender Caglar Soyuncu chu pound maktaduai 19 velin an lalut a, kum nga chhung atan contract an ziahpui.