Premier League transfer bazar a tawp

Ningani zan dar 9:30-ah Premier League transfer bazar a tawp a, fans tam takin an player lakluh tharte an lawm laiin fans ṭhenkhat erawh an player lakluh danah an lawm lo a, Tottenham Hotspur phei chuan player lakluh an nei miah lo!

Manchester United fan-ten ring fan awk awk chunga transfer tawp ni an thlir laiin player lakluh belh an nei lo a, Everton, Fulham leh Leicester City ten transfer tawp ni-ah sum an seng ṭeuh thung.

Season dangah chuan Premier League ṭan hnuah pawh nipui transfer kalpui ṭhin a ni a, mahse season ṭantir khan Premier League club ten inelna ṭan hmaa transfer bazar tih tawp duhin vote an thlak - club 14-in August 9-a tihtawp an duh a, a duh lo lam club paruk chiah an nih avangin transfer bazar hi tihtawp hma a ni.

Tottenham leh Manchester United chu Premier League khelh hnu pawha transfer kalpui duh zinga mi an ni. August 17-ah Italy transfer bazar an khar dawn a, tun thla tawp thlengin Spain, Germany leh France-ah chuan transfer an la kalpui thung ang.

Hemi awmzia chu European club dang te Premier League-ah an la bazar thei tho tihna a ni - a sawifiah dan awlsam berah chuan Real Madrid-in Eden Hazard an la lalut thei tihna a ni a, Chelsea tan erawh a thlakna tur lei theih a ni tawh lo thung.

Transfer tawp ni
Chelsea-in transfer bazar tawp niah Real Madrid midfielder Mateo Kovacic chu loan-in an lalut a, Spanish club lamah hian goalkeeper Thibaut Courtois chu loan-in an kaltir ve thung.

Everton-in transfer bazar barakhaihin player pathum ngawt an lalut a, Colombia defender Yerry Mina leh Portugal midfielder Andre Gomes te chu Barcelona aṭangin an lalut a, Bernard chu free-in an lalut bawk.

Fulham-in transfer tawp niah player panga an lalut a, Marseille midfielder Andre-Frank Anguissa leh Bristol City left-back Joe Bryan a nghetin an lalut a, Sergio Rico, Luciano Vietto leh Timothy Fosu-Mensah te chu loan-in an lalut bawk - Premier League kai thar zinga nipui transfer-a pound maktaduai 100 seng hmasa ber an ni.

Leicester City-in transfer tawp niah player pahnih lalutin Freiburg leh Turkey defender Caglar Soyuncu bakah Dinamo Zagreb aṭangin defender Filip Benkovic te an lalut.

Transfer tawp nia langsar zingah Danny Ings chuan Liverpool aṭangin Southampton chu loan-in a zawm a, Swansea forward Jordan Ayew chuan Crystal Palace a pan a, West Ham-in Arsenal striker Lucas Perez leh Fiorentina midfielder Carlos Sanchez an lalut bawk.

Player lalut lo
Transfer tawp niah club paruk ngawtin player an lalut lo a, Tottenham chu Premier League club zinga nipui transfer-a player lakluh nei miah lo hmasa ber an ni!

Spurs manager Mauricio Pochettino erawh a lawm tho. Argentine manager chuan, "Lawm lohna leh lungngaihna tur engmah a awm lo a, ka hlim em em zawk a ni. Squad ṭha tak kan nei a, player 25 ṭha tak kan neih avangin inbelh leh tur chuang kan awm lo," a ti.

Hetihlai hian Spurs ṭantu intelkhawm pawl Tottenham Supporters' Trust chuan transfer bazar-a player an lalut lo chu an hriatthiam loh thu leh a chhan hriat an phut thu an tarlang. Spurs hian player lakluh tum lo tawp chu an ni lo - pound maktaduai 25-in Aston Villa midfielder Jack Grealish an dawr a, an hlawhtling lo.

Manchester United-in nipui transfer-ah player pathum chiah an lalut a, manager Jose Mourinho-a'n player lak belh a duh thu sawi mah se Tottenham defender Toby Alderweireld, Leicester defender Harry Maguire leh Bayern Munich defender Jerome Boateng lakluh an tumna a tlawlh vek.

United hian transfer tawp ni hian Diego Godin dawr tlai khawhnu mah se hetah pawh an hlawhtling chuang lo - Atletico Madrid defender hian Spanish club-a cham turin contract thar a ziak ta zawk.

Sum sen dan
Deloitte chuan nipui transfer-a Premier League club te sum sen zat an chhut a, nikuma sum sen zat aṭangin pound maktaduai 200 zetin Premier League club te an insen tlem thu an sawi.

Nikum nipui transfer-ah khan Premier League club ten pound tluklehdingawn 1.4 an seng a, kuminah erawh pound tluklehdingawn 1.2 an seng thung. Nikum transfer bazar tawp niah khan pound maktaduai 210 ngawt an seng a, kuminah erawh pound maktaduai 110 bak a ni lo.

Mahse, Premier League club te hian season hmasa aiin tun season-ah ram pawn aṭangin player lakluh nan an inseng hnem zawk. Season hmasa khan league dang aṭanga player lei nan pound maktaduai 770 an seng a, tun ṭumah erawh pound maktaduai 880 an seng thung.

Chumi awmzia chu Premier League club ten transfer bazar-a an sum sen aṭanga 72% chu foreign league lamah an theh chhuak tihna a ni a, season hmasa kha chuan 54% a ni.