Quarterfinal-ah Saina leh Sindhu an lut

Nimin khan Malaysia Masters Super 500 badminton tournament-ah Saina Nehwal leh PV Sindhu te chuan an khingpui ve ve hnehin quarterfinal an inhlangkai a, season bul an ṭan fuh an chhawm nung zel.

Seeded pawh chang phak lo Saina inkhel a hmuhnawm, London Olympic bronze medalist hian South Korea nula An Se Young chu minute 39 chhungin 25-23, 21-12 in a hneh, a match lehpekah chuan Olympic champion Carolina Marin a hmachhawn tawh dawn avangin a hautak zual ang.

Inkhel dangah Sindhu chuan minute 34 chhungin Japanese shuttler Aya Ohori chu 21-10, 21-15 in a hneh a, an intawn hnuhnung pakuaah Sindhu hian hnehna chang vekin a chungnung hle.

World champion Sindhu tan semifinal thleng tur chuan a hmabak a hautak dawn, world number 1 Tai Tzu Ying leh seeded pasarihna Sung Ji Hyun te inkhela a chak zawk nen quarterfinal-ah an intawng dawn a ni. Mipa singles lamah Sameer Verma beiseina chu second round-ah a thamral, India tlangval hian Lee Zii Jia chu 19-21, 20-22 in a hneh lo. Match hmasa berah Kidambi Srikanth a tla tawh bawk a, mipa lamah India tan beisei tur a awm tawh lo.