FA Cup aṭangin Arsenal an tla
Arsenal leh FA Cup a inzawm nghet ṭha viau a, inelna danga an chet fuh theih loh lai pawha Gunners chet ṭhatna ṭhin a ni. Mahse, tunah chuan Mikel Arteta leh a naute hi Nottingham Forest 1-0 a hneh loin FA Cup third round aṭangin an tla.
North London club hian kum 1996 hnu lamah FA Cup third round aṭanga tlak hi vawi hnih chiah an nei, an chak loh ṭum hniha an ngam loh chu Nottingham Forest ve ve hi an ni a, tun hnai kum li chhungin vawi hnih an hneh lo.
Pathianni zan inkhel dangah Tottenham Hotspur an mualpho teuh hle. Spurs hian goal khat an phurh reng hnuah Morecambe chu 3-1 in an lehthal hram. Hun tawp hma minute 20 chauh awm tawhah goal thum an khung a ni.
Mangṭha Gunners
Manchester City laka an khelh danah Arsenal fans an lungawi a, chak lo mah se football hmuhnawm an chhawp chhuak. Championship club lakah erawh chak phu khawpin an khel chhuak lo hrim hrim, goal hlauhawm pawh an nei thei lo hial a ni.
City Ground-a inkhelah Nottingham tan Lewis Grabban chuan hun tawp hma minute sarih chauh awm tawhah goal awmchhun hi a khung. England winger Bukayo Saka, Norway playmaker Martin Odegaard leh Gabriel Martinelli ten inkhel bul ṭan mah se a chhanletna an nei lo.
Championship club ni mah se Nottingham Forest hi FA Cup-ah zuam ngawt chi an ni lo, tun hnai kum ruk chhung chu an khelmuala FA Cup an khelhah chak loh an nei lo - Gunners ngei pawh hi 2018 khan an lo pet chhuak tawh.
Min ngaidam ru
An chak loh danah Mikel Arteta-a'n chhuanlam a siam lo a, fans lakah ngaihdam a dil zawk. Arteta chuan, "Chak turin kan khel ṭha tawk lo, min ngaidam rawh u. Tun ai khan chak duhin kan tuihal nasa zawk tur a ni, khatianga khel tur kha kan ni lo.
"Kan khelh danah ka lawm lo hle, chutih rualin FA Cup hi ka hmelhriatna a rei tawh a, tawnhriat pawh ka nei hnem ve tawh. Nottingham khan chak an tum ngam a, chak duhna thinlung nei liam zawk hian hnehna an chang mai ṭhin," tiin a sawi.
Nottingham manager Steve Cooper chuan, "Inkhelh hmain ruahmanna fel tak kan nei. Goal nawr dan tur kan zir uluk a, chutiang chian chuan counter attack aṭanga min beihna lai lo danchah dan tur kan inhrilh uluk bawk," a ti a, a naute khelh dan a chhuang hle.
Spurs an tlang
League One club Morecambe lakah Tottenham-in goal an chhuah hmasa, chawlhlawk hmain defender Antony O'Connor-a'n yard 10-a hla aṭangin mikhual tan goal hmahruai a khung a, mualneitu lam an hawihai hle.
Antonio Conte-a'n mualpho theih a nihzia a hrechiang, minute 69-naah Lucas Moura, Harry Kane leh Oliver Skipp te chu bench aṭangin a rualina dah lut ṭhawt a, an luh aṭanga minute ngana hnuah goal an sual chhuak - Harry Winks-a'n sutin Moura leh Kane ten an khung belh bawk.
Tottenham Hotspur Stadium chhunga Morecambe fans kal khawmten chak an lawm hman teuh hle, an boruak pawh a ṭha. Mahse, hun tawp dawn minute 16 chhungin team pahnih dinhmun a inthlak danglam hlawk a, a tira ngui zawk Spurs kha a tawpa hlim zawk an ni.
FA Cup - Third Round
Luton Town 4 - 0 Harrogate Town
Stoke City 2 - 0 Leyton Orient
Liverpool 4 - 1 Shrewsbury Town
Cardiff City 2 - 1 Preston North End
Tottenham Hotspur 3 - 1 Morecambe
Wolves 3 - 0 Sheffield United
West Ham United 2 - 0 Leeds United
Charlton Athletic 0 - 1 Norwich City
Nottingham Forest 1 - 0 Arsenal