Federal Court-in Djokovic a chhuah

Novak Djokovic-a visa chungchanga buaina chu nimin khan Federal Circuit Court-in a ngaihtuah a, judge Anthony Kelly chuan Australian sorkarin visa a cancel sak tawh chu a sut leh a, world number 1 hi an hrenna hmun aṭangin a chhuak thei.

Visa tih nunsak leh a ni a, inelna lian Australian Open a khel thei dawn tihna a ni. Mahse, thu a la tawp lo, immigration minister Alex Hawke chuan visa hi a thuneihnain a la 'cancel' sak leh thei a, thu inchuh a la awm rih dawn niin a lang.

Buaina chu
Australian Open 2022 khel tur chuan Covid-19 laka invenna lak ngei a ngai. Vaccine an la lo a nih chuan taksa hriselna thil vanga la lo an ni tur a ni a, an lak loh chhan hi Australian Open khelhna tur state Victoria sorkar leh Tennis Australia hnuaia endiktuten an pawm a ngai.

Serbian star Djokovic hi vaccine la duh lo zinga mi a ni. Australian Open buatsaihtu leh state sorkar lamin thuchhuah siam fo mah se invenna hi a la duh chuang lo a, mahse duhsak takin Australia a pan theih nan visa a hmu thei tho.

January 5, Nilaini khan Australia a pan a, a zin thu hi social media lamah a tarlang. Vaccine la loin an ram a pan tih an hriatin Australia mipui ṭhahnem tak an thinur a, an chunga inkhuahkhirhna khauh tak lekkawh a nih laia ram dang miin dan a zawm lo chu an hua.

Mipui an thinrim miau avangin sorkar a inrawlh a ngai. Australian prime minister Scott Morrison chuan "Tumah dan chunga leng an awm lo, visa hi cancel a ni," a tih avangin Djokovic hi Australia a thlen hnuah pawn chhuak thei loin an khung hrang nghal.

Court an pan
Djokovic-a dan hremi Nick Wood chuan a player laka rorelna dik a awm theih nan Federal Circuit Court-ah thubuai a theh lut a, a player hian nikum tawp lamah khan hripui a kai avangin vaccine a lak loh chhan hi a taksa hriselna thil a nih thu a sawi.

Dan hmang thoin visa a hmu thei a, a tum ram a thlen fel vek tawh hnua visa cancel sak a ni chu court hmaah a sawifiah bawk. Wood chuan, "Novak hian Tennis Australia lamin ti tura an duh ang zawng zawng a ti vek," tiin tih sual an neih loh thu a sawi chhuak.

'Visa cancel' chungchang bikah chuan court-in sorkar thutlukna a hlip a, nimin chhun khan thutlukna a puan aṭanga minute 30 chhungin Djokovic-a visa chu ti nung lehin, a duhna hmuna kal chhuak thei turin zalenna a pe nghal a ni.

Djokovic hian vaccine a lak leh lak loh chungchang hi mipui hmaah chiang takin a la sawi lo, hemi chungchanga thu thar a neih hnuhnung berah chuan a la lo tih a ni. Nikum khan hri leng hi vawi hnih chu a kai ngei a, mahse natna nei hran loin a fihlim leh tawh a ni.

A la tawp lo
Federal Circuit Court berin a chhuah zalen chuan Australian Open 2022 a khel dawn chiang ni mai awm tak a ni. Mahse, dan chu dan hmang veka tih chet theih a la ni leh ṭhin. Tun dinhmuna chumi ti theitu chu immigration minister Alex Hawke a ni.

Australia ram danah chian Hawke-a hian a chhan chu eng vang pawh ni se visa hia duh chuan a tihtawpsak nghal thei. Court-a thubuai an inchuhnaah pawh sorkar dan hremi Chris Tran chuan hei hi an la ṭan chhan tur a nih thu a sawi chhuak.

Immigration minister Alex Hawke-a'n a thuneihna a hmang a nih chuan Djokovic tan hian thil pawi zawk a la thleng thei, sorkar thuneihna hmanga visa cancel sak a nih chuan kum thum chhung Australia a tlawh phal a ni dawn lo.

Visa chungchang bikah chuan court lamin a tih tur chi a tifel a, sorkar lamin eng tiangin nge hma an lak chhunzawm dawn tih chu ka hre thuai ang. Hma an la chhunzawm lo a nih chuan Novak-a'n Australian Open a khel ngei dawn.

Tennis thlirna
Roger Federer (kum 40), Rafael Nadal (35) leh Djokovic (34) ten Grand Slam nomawi 20 ṭheuh an kawl mek a, an zinga kum naupang ber Djokovic-a'n record thar siam theihna remchang a nei a, mahse a hlawhtling dawn em tih erawh hriat a la ni lo.

US Open 2020-ah khan Djokovic hian major title la hnem ber nih theihna remchang a lo nei tawh - Nadal leh Federer an inlan ve lo. Mahse, ṭul lo taka line judge chu ball a vuak per avangin tournament aṭanga tlak tir nghal a lo ni tawh.

Kumin Australian Open-ah hian Federer a inlan dawn lo, champion lai Djokovic elpui Nadal erawh a inlan dawn. Player ropui pahnih zingah hian a ṭha zawk thlan tur an awm bik lo - Melbourne Park a nih erawh chuan Djokovic hi rinkai zawk a ni ang.

Djokovic hian tournament hmachhawn zui pawh ni se fans lamin an ṭan vak dawn lo tih a chiang tawh. Nomawi chawi hnemin hlawhtling viau mah se mipuiin Federer leh Nadal te an ngaihsan leh ngainatna ang hi chu an hlawh chhuak ve thei dawn lo niin a lang ta.