Liverpool buaina 'False Positive'

FA Cup third round-ah Liverpool-in Shrewsbury Town 4-1 in an sawp a, inkhel chungchang aiin inkhelh bana Jurgen Klopp-a thusawiin sawizui a hlawh zawk. German manager hian Reds player Covid-19 kai tarlan zingah Trent Alexander-Arnold chauhin hri a kai tak tak a ni a, a bak zawng chu false positive vek niin a sawi.

Pathianni zan inkhelah Klopp-a'n Covid-19 kaihhnawih vanga khung hran Alisson Becker an la chhawr thei lo a, hliam vangin Divock Origi, Thiago Alcantara, leh Harvey Elliot te an khel thei lo. Player pawimawh Mohamed Salah, Sadio Mane leh Naby Keita te AFCON khelin an zin chhuak bawk.

League One club Shrewsbury Town-in teenager pali ngawt bul ṭantua hmang Liverpool lakah goal an khung hmasa a, Daniel Udoh-a'n minute 27-naah goal hmahruai a khung. Amaherawhchu League One club tan Reds an ṭha mah mah a, mualneitu tan Fabinho-a'n goal hnih a khung bakah Kaide Gordon leh Roberto Firmino ten goal khat ve ve an khung bawk.

German manager Klopp chuan, "Kar liam ta khan Covid-19 vangin kan buai a, false positive ṭhahnem tak kan nei tih hriatchhuah a ni hnuhnawh. Mahse, dan a awm a, false positive player-te pawh an khel thei lo. Positive tak tak chu Trent Alexander-Arnold chauh a ni a, a bak zawng kha false positive an ni.

"Training ground khar a ngai a. Player-ten training an neih theih loh avangin hun harsa a ni a. Covid-19 false positive vangin ṭum hnih ngawt test hun pangngai bakah test a ngaih phah a, a hautak hle," tiin a sawi.

Kar liam ta Nilaini khan assistant manager Pep Lijnders-a'n Covid-19 a kai avangin first-team training centre an khar a, Arsenal nena League Cup semifinal first leg an khel tur an sawn. England-ah meuh 'false positive' vangin an buai a, inkhelh hun sawn a ngaih phah hial.

League Cup semifinal first leg hi Anfield-ah January 13, Ningani zanah khelh a ni ang a, second leg hi Emirates Stadium-ah January 20, Ningani zanah khelh a ni leh ang.