AFCON an ṭan ta: A thlengtu Cameroon chak nghal
Africa khawmualpuia ram leh ram inelna sang ber, Africa Cup of Nations chu Pathianni zan khan khelh ṭan a ni ta a, match hmasa berah inelna thlengtu Cameroon chuan 2-1 in Burkina Faso an hneh nghal.
Mikhual tlangnel Burkina-in Gustavo Sangare hmangin goal hmahruai khung mah se Cameroon-in an chhanglet a, captain Vincent Aboubakar chuan penalty hmanga goal hnih khungin a team hi hnehna a chanpui a ni.
Nizanah inkhel dang pali a awm a, he thu buatsaih a nih lai hian result kan hre hman lo thung - AFCON hian a tirah thawm nei lian lo mah se a chhehvel boruak avangin ngaihven a hlawh thar.
Zaninah pawh Riyad Mahrez telna Algeria (vs Sierra Leone) leh Mohamed Salah telna Egypt (vs Nigeria) te an inlan dawn a, a bik takin Best FIFA Men's Player-a top three-a lang phak Salah hian ngaihven a hlawh lehzual ngei ang.
A hmuhnawm nghal
Covid-19 vangin kum khat ngawtin AFCON sawn hlat ngai mah se khelh a nih meuh chuan a boruak a danglam phah lo a, Olembe Stadium-a opening ceremony ropui tak hman zawha inkhel hi a hmuhnawm takzet.
Burkina Faso defender Steeve Yago chuan inkhel ṭantirah Collins Fai a tlawh nghal a, red card hmu pawh ni se awm lo a nih loh laiin a vannei a, yellow card chiah pek a ni.
Mikhual team bawk an tlangnel chhunzawm a, Aston Villa striker Bertrand Traore ball tauh goal ngei tur nia lang chu Nouhou Tolo chuan goal line aṭangin a lo pet chhuak a, Sangare-a'n crossbar a tihper bawk.
Mahse, Burkina an beidawng duh lo - Traore bawkin mual ding lamah ball a chang fuh a, Sangare tan a thlawh lut. Ligue 2 club Quevilly-Rouen midfielder hian a ke vei lamin mawi zetin minute 24-naah a volley a, Cameroon keeper Andre Onana-a'n ball kal dan a chhut sual vang a ni tel.
Beidawng lo Cameroon
Mahni mualah ngei AFCON an thleng a, Cameroon-in an match hmasa berah team tenau zawka ngaih lakah goal an chhuah hmasa - an tlawm ngat phei chuan a mualpho thlak dawn a, thih tha nena beih a ngai.
Mahse, Indomitable Lions (Cameroon sawina) an hnufual rei lo. Traore-a'n ṭul lo takin Andre-Frank Zambo Anguissa lakah penalty a chawi a, first half tawp nan minute nga chiah a awm tawh tihah Aboubakar chuan video assistant referee hmanga ennawn penalty hi goal-ah a chantir.
Cameroon tan rang takin thil a thleng a, an vannei nawn - first half injury time-ah Issoufou Dayo chuan Tolo lakah penalty a chawi a, Aboubakar bawk rawn pen chhuakin, goal-a chantir turin harsatna a nei lo.
Kum 2017 khan Cameroon hian Nations Cup nomawi an chawi a, khami ṭum khan Aboubakar hian a goal hmangin final-ah Cameroon a lo chakpui tawh a, Porto leh Besiktas tan pawha a lo hming chher tawh striker hian a team champion pui ngei a tum ruh hle.
Football mawina
First half-ah goal thum ngawt a lut a, chawlhlawk hman hnuah goal dang lut lo mah se a hmuhnawmna erawh a dang phah lo - Traore chuan long range free kick ṭha zetin a pet a, mahse, André Onana chuan a dansak.
Ajax aṭanga Inter pan tur keeper hian hnai set sawt aṭangin Cyrille Bayala chance neih chu a dansak bawk a, kum 25 mi keeper tan chuan zan chhinchhiah tlak a ni ngei ang.
February 2021 khan Onana hi a taksaah damdawi hman phal loh hmuh a nih avangin thla 12 chhung inkhel thei lo tura hrem a lo ni tawh a, mahse, hei hi June thla khan Court of Arbitration for Sport chuan thla kuaah a tihtawi sak - a hmangaih ber football khelin hun a hmang leh ta.
Cameroon tan Aboubakar chuan hattrick a siam niin lang hman mah se VAR hmanga ennawn a nih hnuah referee-in huaisen thlak takin thutlukna a siam a, a pawm lo - Cameroon tan Zambo Anguissa pawhin chance a nei leh a, mahse, a pawimawh ber goal erawh second half-ah a lut nawn tawh lo.
January 9, Pathianni Zan
Cameroon 2 - 1 Burkina Faso
CAM: Vincent Aboubakar 40' (P); 45+3' (P)
BUR: Gustavo Sangare 24'
Ethiopa 0 - 1 Cape Verde
ETH : Yared Bayeh Belay 12'
Zanin Inkhel Tur
Algeria 6:30 PM Sierra Leone
Nigeria 9:30 PM Egypt
Sudan 12:30 AM Guinea-Bissau
*Inkhel hi Sony Six leh Sony ESPN ten live-a en theihin an pe chhuak.
AFCON THLIRNA TAWI
Inelna thlengtu Cameroon
Team tel zat 24
Inkhelh hun 9 Jan - 6 Feb, 2022
GROUP ṬHEN DAN
Group A : Cameroon, Burkina Faso, Ethiopia & Cape Verde
Group B : Senegal, Zimbabwe, Guinea & Malawi
Group C : Morocco, Ghana, Comoros & Gabon
Group D : Nigeria, Egypt, Sudan & Guinea-Bissau
Group E : Algeria, Sierra Leone, Equatorial Guinea & Ivory Coast
Group F : Tunisia, Mali, Mauritania & Gambia
• Group tin aṭangin team pahnihin last 16 an lut ang a, pathumna zinga ti ṭha paliten knockout stage an lut bawk ang.
• Round of 16 hi January 23-26, 2022 chhunga khelh tur a ni.
• Quarterfinal hi January 29-30 ah khelh tur a ni a, semifinal hi February 2-3 ah khelh tur niin final hi February 6-ah khelh a ni ang.
• AFCON-a champion lai hi Algeria an ni a, final-ah Senegal 1-0 in an hneh.
• AFCON-ah Eygpt vawi sarih champion tawhin champion ngun ber an ni a; Cameroon (5), Ghana (4), Nigeria (3), Ivory Coast (2), Algeria (2), DR Congo (2) te bakah Zambia, Tunisia, Sudan, Etihiopia, Morocco, South Africa leh Congo te vawi khat ṭheuh an champion
tawh bawk.