Nadal tan title hmasa

Rafael Nadal chuan Melbourne Summer Set khelh zawh takah Maxime Cressy chu 7-6 (8-6), 6-3 a hnehin a champion. Spanish star hian January 17 aṭanga khelh tur Australian Open atan inbuatsaihna a nei ṭha hle.

Nadal hian nikum September thla hnua a vawi khat nan tournament a khel ve leh chiah, a ke hliam vangin a chawl rei hle. A hliam dam hnuah hripui a kai zui a, tunah chuan harsatna nei loin a inkhel thei leh tawh tihna a ni.

Kum 35 mi Nadal chuan, "Tournament khelh theih hi a lawmawm a, nomawi chawi phei chu a lawmawm zual hle. Hliam leh chhan hrang hrang vangin tun hnaiah ka inkhel tam tawk lo, nuam ti taka inkhelh theih hi chu duhthusam a ni," tiin a sawi.

Hmeichhe inelna Melbourne Summer Set 1 lamah Simona Halep a champion ve thung. Romanian nula hian Veronika Kudermetova 6-2, 6-3 in a hneh a, tennis a khelh hun chhunga nomawi 23 a chawi tlinna a ni chiah.

Halep pawh hi hliam vangin a inkhel tam lo, season hmasa khan French Open leh Wimbledon pawh a khel thei lo hial. Kuminah erawh bul a ṭan fuh hle a, hliam nei loa a khel tluang a nih chuan player hmuhnawm berte zinga mi a ni leh ang.