Kidderminster-in West Ham an chang!

FA Cup third round-ah knockout tournament mawina hmuin beisei loh result kan hmu nual a, fourth round-a inhmachhawn tur pawh a chiang leh der tawh - National League North club Kidderminster Harriers chuan Premier League club West Ham an hmachhawn dawn.

English sixth division club hian third round-ah football khawvel an lo barakhaih tawh a, an mikhual, Championship club Reading chu 2-1 in an hneh - team pahnih inkarah club 79 an awm a, footbal-ah thil thleng thei lo a awm lo, tih chu nemnghehin a awm .

Fourth round-ah Reading aia ṭha zawk team an hmachhawn dawn a, mahse, non-league club tan chuan huphurh taka thlir aiin West Ham ang team ṭha tum theih hi thu lawmawm zawk a ni.

Kidderminster manager Russell Penn chuan, "British manager zinga zah kai ber pawl David Moyes ka hmchhawn dawn a, ka tan chuan thu lawmawm bik a ni. Moyes hian FA Cup a ngaihlu tih ka hria a, kan tan chuan hmachhawn an châkawm tawh hle," a ti a, beiseina a nei sang.

Penn chuan, "Thawnthu ngaihnawm dang kan ziak mai thei asib," tiin a sawi bawk a, Reading-a an hnathawh ropui tak kha an la theihnghilh miau loh avangin rin aiin tawh an khirh mai thei.

Premier League hmahruaitu Manchester City chuan Fulham an hmachhawn dawn a, awlsam taka namnul chi an ni bik dawn lo - Pep Guardiola leh a naute tan fimkhur a ṭul ang.

Liverpool-in Championship club Cardiff City an mikhual dawn a, Jurgen Klopp-a'n England a pan hnuah FA Cup nomawi a la chawi loh avangin a ngai thutak ngeiin a rinawm.

European champion Chelsea-in League One club Plymouth Argyle an mikhual dawn avangin awlsam tura ngaih a ni a, Tottenham Hotspur-in Brighton & Hove Albion an mikhual dawn avangin a khirh fak ang.

Goodison Park-a Everton leh Brentford ten fifth round luh an inchuh tur hi en a châkawm tawh takzet a, Wolverhampton Wanderers leh Norwich City inkhel tur pawh an inkhingtawk viau ang.

League One club Cambridge United-in Newcastle United petchhuah man telin fourth round an khel dawn a, Magpies hneh thei an nih avangin Championship-a 16-na ni mek Luton Town an hmachhawn tur hi an huphurh lo ang.

Nizanah Manchester United leh Aston Villa-ten fourth round lut tur an la zawng ve chauh a, he thu buatsaih a nih lai hian result kan hre hman lo. An pahnih inkhela chak zawkin Middlesbrough an mikhual dawn.

FA Cup fourth round hi February 4-7 inkara khelh tur a ni a, nizana Nottingham Forest laka tlawm Arsenal kan hmu tawh dawn lo.

FA Cup Fourth Round
Crystal Palace vs Hartlepool United
Bournemouth vs Boreham Wood
Huddersfield Town vs Barnsley
Peterborough United vs Queens Park Rangers
Cambridge United vs Luton Town
Southampton vs Coventry City
Chelsea vs Plymouth Argyle
Everton vs Brentford
Kidderminster Harriers vs West Ham United
Manchester United/Aston Villa vs Middlesbrough
Tottenham Hotspur vs Brighton and Hove Albion
Liverpool vs Cardiff City
Stoke City vs Wigan Athletic
Nottingham Forest vs Leicester City
Manchester City vs Fulham
Wolverhampton Wanderers vs Norwich City