Juve lakah Roma an tlawm
Dinhmun duhawm taka an din hnuah AS Roma chuan Juventus 4-3 in an ngam lo. Jose Mourinho chuan an chak loh chhan chu an rilru huaisen tawk loh vang a nih thu a sawi, season thara Champions League khelh phak a harsa dawn.
Goal sarih a lut
Tammy Abraham-a goal hmangin Roma lamin hma an hruai a, mikhual lamin Paulo Dybala hmangin sut mah se Henrikh Mkhitaryan leh Lorenzo Pellegrini te hmangin 3-1 in hma an hruai fal thei lo.
Mourinho-a'n Arsenal aṭanga loan hmanga a hawh Ainsley Maitland-Niles chu bul ṭantu zingah a telh nghal a, anmahni mualah chak ngei tur nia an lan hman avangin an boruak pawh a ṭha hle.
Mahse, Old Lady lamin hun tawp hma minute 20 chhungin Manuel Locatelli, Dejan Kulusevski leh Mattia De Sciglio te goal hmangin 4-3 in an lehthal daih. Hun tawp dawnah Roma tan Pellegrini-a'n penalty a hlah.
Jose a lawm lo
AS Roma manager Mourinho chuan, "Minute 70 chhung chu kan khel ṭha hle, a hnu lamah erawh kan rilru a nghet tawk lo. Kan chiai a, kan huaisen miau loh avangin kan khingpui lamin kan duh ang angin min bei thei," tiin a naute a sawisel.
Roma hian point 32 chauh an la hmu a, champion lai leh hmahruaitu Inter Milan an phak lohna chu point 17 lai a ni. Champion beisei ngam chi a ni tawh lo a, pasarihna an nih avangin a sang pali zinga tel phak pawh a awlsam lo ang.
Hun tawp dawna penalty dangtu Juve keeper Wojciech Szczesny chuan, "Dinhmun a inthlak zak zak hnuah a vannei zawk kan ni, kan vanneihna ti zual turin a tawpah penalty kan dansak kha a lawmawm," tiin a sawi a, an tan boruak siam ṭha zualtu a nih a beisei thu a sawi bawk.
Inkhel dang
AC Milan chuan an hmelma Inter Milan an kal fal tir duh bik lo. Milan hian minute hnihna lekah Zlatan Ibrahimovic hmangin goal hmahruai an khung a, goal an chhuah loh bakah Theo Hernandez-a'n goal hnih khung belhin Venezia chu 3-0 in an hneh.
Hnehna an chan avangin Milan hian hma an hruai hman zuai, mahse Inter Milan chuan Lazio 2-1 a hneh zui ve lehin hmahruaitu an inthlak zui leh nghal. Inter tan Alessandro Bastoni leh Milan Skriniar ten goal khungin Ciro Immobile goal-in Lazio a chhan zo lo.
Season hmasa khan Inter leh Milan hi an inum na hle, season chawhnu lama daih rei zawk Inter an chungnung a nih kha. Kuminah pawh Milan team pahnih bawkin Serie A nomawi an inchuh chho leh mek, boruak a nung chhunzawm zel ang.