Kerala Blasters tan champion beiseina

Tun season Indian Super League-a an match hmasa pathumah chak zo lo mah se Kerala Blasters-in en liam mai chi an ni lo tih an pholang a, a zawnin match sarih chhung an tlawm ta lo.

South Indian club hian Pathianni zan khan team ṭha zinga mi Hyderabad FC chu 1-0 in an hneh a, he thu buatsaih lai hian ISL table chung ber an luah mek.

Nizan khan Mumbai City an inlan a, Laleng-mawia khelhna club hian Bengaluru lakah point an hlawhchhuah chuan table chung ber an luah leh dawn thung - he thuziak i chhiar meuh chuan table a danglam leh tawh mai thei.

Pathianni zan inkhelah Alvaro Vazquez chuan minute 42-naah inkhela goal awmchhun hi a khung a, Blasters tana goal khungtu kum 30 mi hian Espanyol leh Getafe tan La Liga pawh a lo khel tawh.

Hyderabad tan Bartho-lomew Ogbeche chuan a club hlui Blasters lakah si phurh sutna hun remchang nei mah se a chhawr thei lo a, tun season-a goal kua khung tawh Paris Saint-Germain striker hlui hian league match 10 a khelhnaah goal a keng tel tlat lo thung.

Blasters tan K. Lalṭha-thanga'n minute 90 a khel tluan a, Bethlehem Vengthlang tlangval Puitea hian a team tan a khel chhe lo.