Kar riat chhung chawl tur Wilson

Newcastle United striker Callum Wilson chu FA Cup aṭanga an tlak hnuah kar riat tal a chawlh a ngaih tur thu tihchian a ni a, Magpies boss Eddie Howe chuan a striker hi chawn hliam vanga chawl tur a nih thu a sawi.

English striker hi December 27-a Man-chester United nen an inhnehtawk ṭumin first half-ah a inhliam a, Howe chuan FA Cup-a Cambridge an ngam loh hnuah he thu hi a sawi a ni.

Kum 29 mi Wilson hian tun season-ah match 15 khelin goal ruk a khung tawh a, Newcastle player zingah tun season-a ani aia goal khung hnem an awm rih lo.

Magpies tan thlasik transfer bazar-ah striker melh a ngai ngeiin a rinawm a, Saudi Arabia aṭanga sum ngah thar hlim club hian khawi lam mi nge an lakluh dawn, tih chu thil hriat châkawm a ni.

Chutihrual chuan FA Cup third round-a an ngam loh Cambridge United hi League One club an ni a, vawi 23 zet shot an nei chungin goal an khung lo - team ṭha tak din tur chuan Magpies tan uchuak taka sum sen a ngai ang.