Villarreal leh Atletico an inhnehtawk

Pathianni zan La Liga inkhel hmuhnawmah Atletico Madrid leh Villarreal te 2-2 in an inhnehtawk.

El Madrigal-a inkhelah Atletico tan Angel Correa-a'n minute 10-na lekah goal hmahruai an khung. Mualneitu an vannei tawk lo a, Gerard Moreno-a'n penalty a hlah bakah Daniel Parejo goal khung chu offside vangin pawm a ni lo. Yellow Submarine an vanduai reng lo a, Pau Torres (29') leh Alberto Moreno (58') te goal hmangin an lehthal.

Atletico-in point khat hlu tak an neih theih nan Geoffrey Kondogbia-a'n minute 67-naah siphurh a sut a, 2-2 inkhel a tawp.

Hun tawp thlengin inkhel hi a hmuhnawm a, injury time-ah Atletico tana goal pawimawh khungtu defender Kondogbia hian yellow card vawi hnihna hmuin hnawhchhuah a ni.

Diego Simeone kaihhruai Atletico Madrid hian match 20-ah point 33 chauh an hmu a, pakhatna Real Madrid nen point 16-a an inthlauh avangin champion nomawi humhim a harsa dawn. Atletico hian January 13, Ningani zanah Athletic Bilbao nen Supercopa de Espana semifinal an khel ang.