PSG leh Lyon inhnehtawk

Paris St-Germain chu an mikhualna ramah an tlawm teuh hle. Paris club hian goal khat an phurh reng hnuah substitute Thilo Kehrer hmanga sut hramin Lyon nen 1-1 in an inhnehtawk.

Pathianni zan French Ligue 1 inkhelah minute sarihna leka Lucas Paqueta goal khung chu hun tawwp dawnah PSG lamin an sut. Kylian Mbappe a vannei tawk lo, goal ban vawi hnih ngawt a tih per. Marquinhos-a khung tur Lyon keeper Anthony Lopes dan chu a ṭha hle bawk.

Mauricio Pochettino-a'n hripui vangin player pali a chhawr thei lo, an zingah hian Lionel Messi pawh a tel. Neymar chu kerek hliam vangin a la inkhel thei rih lo a, an khingpui hi team ṭha an nih ve tho avangin Poch-a hote tan player langsar tel loin hnehna chan a harsa.

Chak zo lo mah se PSG hian khelh zat inangah pahnihna Nice lakah point 11 zetin hma an la hruai fal tho. Lyon erawh an match hnuhnung paliah an khingpui an inhnehtawk pui vek a, table-ah 11-na dinhmun an luah.

PSG manager Poch chuan, "A khel ṭha zawk chu kan ni, mahse goal kan chhuah hma em avangin thil a awlsam lo. Inkhel kan thununin goal khung theihna remchang pawh kan insiam nual, amaherawhchu a chang chuan point khat leka kan lungawi a ṭul chang a awm," a ti.