Champion City lakah Arsenal an tlawm

Arsenal manager thar Unai Emery-a'n Premier League match a hmachhawn hmasak berah Manchester City chu 2-0 in a ngam lo a, champion lai Man City tan Raheem Sterling leh Bernardo Silva ten goal an khung–Pierre-Emerick Aubameyang leh Mesut Ozil te khung erawh offside vanga pawm a ni lo thung.

Pathianni zan khan Emirates Stadium-ah 1996 hnua a vawi khat nan Arsenal chu Arsene Wenger tel loin an khel a, North London club hian French manager thlaktin Spanish manager Emery nei tawh mah se an thawnthu erawh a la danglam thei rih lo, an mahni mualah an elpui club an ngam lo.

Goal hnih a tawk
Pep Guardiola-a'n Raheem Sterling chungah rinna nghatin, chawlhkar khat chauh training zawm hman mah se inkhel bul a ṭan tir. England international forward hian minute 14-naah box sir lama ball a chan chu a lai lamah chak taka tlan phei puiin, Hector Bellerin leh Matteo Guendouzi te a paltlang hnuah yard 20-a hla aṭangin goal hmahruai a khung a, Premier League-a goal 50-na a khung.

Riyad Mahrez-a'n Man City tana a league match hmasa berah free kick a chhuih lut teuh hle a, keeper Petr Cech-a'n harsa taka a dan sak bakah a per rawn pet nawntu defender Aymeric Laporte-a shot pawh ṭha zetin a dan sak zâwn bawk.

Gunners tan Pierre-Emerick Aubameyang leh substitute Alexandre Lacazette ten an siphurh sut theihna hun an nei, mahse striker pahnih hian box pawn aṭanga hmun thawl deuh tak an hmuh aṭangin goal zawnah an pet lo a, keeper Ederson tan hna hautak an siamsak lo.

Season hmasa hliam vanga inlan tam lo Benjamin Mendy chuan harsatna nei loin a khel thei tawh a, France international ke aṭanga ball chhuak hi Sterling-a'n goal hmahruai atan a chantir bakah, minute 64-naah Mendy hian Silva khung turin a siamsak bawk–Portuguese midfielder hian Gunners beiseina chhu chat turin harsatna a nei lo.

City an Class
Hnehna an chan hnuah Pep Guardiola chuan, "Manchester City manager ka ni thei hi ka lawm hle, squad ṭha chungchuang min pe a, sawisel tur ka nei lo. Player dinhmun inang lo tak tak kan nei a, mahse season hnih aia rei awmkhawm tawh kan nih avangin kan hna thawh turah kan chiang tlang a ni," a ti.

Man City hian nipui bazarah first team player pakhat Mahrez chiah lei mah se an neih sa an hum a, Premier League ṭan hma khan Chelsea 2-0 bawka hnehin Community Shield an la tawh bawk.

Germany-in World Cup khel tura an thlan tel loh Leroy Sane aia dah luh Sterling-a'n Arsenal tlarhnung a ngam hle, England international-in goal a khung hma pawhin hnai set sawt aṭangin Cech tan hna hautak zet a siamsak bawk; league goal 50-na khung phu khawpin a khel ṭha.

Nikum September thla hnua a vawi khat nena league match bika bul ṭan lehtu Mendy a hmuhnawm a, goal venhim kawngah a thawhhlawk bakah chhawr a nih dan ang takin tlarhma lam a pui ṭha hle, a ball pass thiamna hmangin goal hnih an khung phah–AS Monaco defender hi a dam a nih chuan Pep-a'n a chhawr rim ang.

City tana goal 202 khung tawh Sergio Aguero-a'n a record neih sa belhchhahna hun nei mah se, keeper Cech chauh a hmachhawn tawhah a khung lo. Argentine striker hian a laia changtu nei lo Kevin de Bruyne hnenah ball pe sa la chuan an goal thumna an khung ngeiin a rinawm; a hnuah Belgian midfielder goal khung tur pawh Cech-a'n a dan sak hram bawk.

An mikhualna hmunah inkhel thunun chungin City an chak thei a, goal tam zawk khung lo mah se point hmu tura an mamawh zat an khung bakah an goal an venghim. Pep chuan, "Hun ṭha kan siam hnem a, ṭha taka khelh chhunzawm kan tum ang, kawng tam takah lawmna tur ka hmu," tiin a sawi. City hian an match lehpekah chuan Huddersfield an mikhual ang.