LG Independence Cup Final-ah LG Managing Director Kim

Mizoram Football Association buatsaih LG Independence Cup final, August 15, 2018 a khelh turah India rama LG Electronics hotupa ber, managing director Ki Wan Kim a lo kal dawn.

Ki Wan Kim hi LG Electronics-a khawvel huap vice president a ni bawk a, tun hmain LG Global Marketing Officer pawh lo ni tawh ṭhin, sumdawnna khawvela mi langsar tak ni phak a ni.

August 15 chawhnu dar 2:00-ah hmeichhe final-ah Pachhunga University College leh Government Maubawk High School an intum ang a, tlai dar 4:00-ah mipa final-ah Aizawl FC leh Chhinga Veng FC te an inhmachhawn bawk ang.

Inkhel bakah hian intihhlimna dangte pawh zeh tel a ni dawn a; MFA chuan LG Independence Cup final en turin mi zawng zawng a sawm.