Marquez hmaah Lorenzo a thleng

Pathianni zan Austrian Moto GP intlansiakah Ducati rider Jorge Lorenzo chuan season thara a teammate tur Marc Marquez tlan pelin hnehna a chang a, champion Marquez-a'n rider championship lama hma a hruai fal lutuk tur a chelh.

Red Bull Ring-ah Lorenzo leh Marquez te an inum tawk hle a, engtik lai mahin an in kalsan hla thei lo. Lap hnuhnung ber an tlan ṭan dawnin Spanish rider pahnih zingah Lorenzo a chefuh zawk a, a hnampui tlan pelin a tawpah hnehna a chang.

Kum 31 mi Lorenzo hian point 130 hmuin championship-ah pangana aṭangin pathumnaah a in vawrh kai a, a chunga awm Valentino Rossi a phak lohna chu point 12 chauh a ni tawh.

Season thara Honda bika khalh tur Lorenzo chuan, "Lap hnuhnung 10-ah kha chuan ka theihtawpin ka nawr a, a ṭhan laiah che fuh mah ila a ṭhenkhat laiah erawh ka elpui te an tlan ṭha zawk thung. Marquez ka tlan pelh hnu kha chuan thi leh thau pawlhin ka bei zui a, bike intlansiakna liana hnehna ka chan ropui berte zinga mi a ni," tiin a sawi.

Bike intlansiakna sang ber Moto GP hi tun season chhungin vawi 19 an tlan dawn a, heng zinga 11 chu an tlan tawh. Vawi nga hnehna chang tawh Marquez-a'n point 201 hmuin hmahruaitu a ni mek a, pahnihna Italian rider Rossi aiin point 59 zeta a san fal tawh avangin a nomawi kawl lai humhim turin a dinhmun a ṭha tawh hle.

Kum 25 mi Marquez chuan, "A nihna takah chuan Ducati bike khalhtu pahnih kha an tlan chak dawn tih ka chiang a, a tir aṭang khan fimkhur leh ṭang takin ka bei nghal. Ka tlan chhe hran lo a, mahse kawng ngilah Lorenzo kha kei aiin tlan chak zawk a ni," a ti.