England-in India an sawp

Second Specsavers Test-ah England chuan inning khat leh 159 runs-in Lords-ah India an sawp a, 2-0 in hma an hruai mek. Third test hi August 18-22 inkar hian Trent Bridge, Nottinghamshire-ah kheh a ni ang.

England an mualpho

India tan engmah a kal fuh lo a, coin toss-ah an chak lo. England-in bat hmasak an thlang a, boruak awm dan chu England bowler James Anderson te tan duhthusam a ni a, an vawm swing ṭha thei hle. India hian run 107 an siam tihin an thi fai vek a, captain Virat Kohli pawhin 23 runs bak a siam lo. Kum 36 mi Anderson-a'n run 20 chiah pein wicket nga a la bawk.

England hun a thleng a, bul ṭan fuh tawk lo mah se khua a ṭha chho a, batsman tan boruak duhawm a inher chhuak. Jonny Bairstow chuan run 93 a vaw chhuak a, Chris Woakes chuan thi loin run 137 a siam ve bawk a. Mualneitu lam hian run 396 an siam tihin wicket sarih chiah an hloh tihin an declare a, an run siam chu chak pui thamah a ngai.

India chet chhiat a kaltluang a, Ravichandran Ashwin leh Hardik Pandya te an pahnih inkarah run 55 an siam tih loh chu mawi hnaia run vaw chhuak an awm lo. England-in mikhual chungah zahngaihna lantir loin run 130-ah an vawm hlum vek a, ni nga khelh tura ni linaah innings khat leh run 159 in an chak.

5-0 duhthusam

England captain Joe Root chuan, "Harsatna lian tham tawk loin 2-0 in hma kan hruai a, amaherawhchu team ṭha tak kan hmachhawn avangin inelna hautak zawk kan hmachhawn a ngai dawn. Tun dinhmunah chuan kan inthlahdah loh a ngai a, chak duhna thinlung kan put reng a ṭul" tiin a sawi.

Whitewash a châk thu sawiin Root chuan, "Kan duhthusam chu match nga ṭha taka khelh a, vawi nga chak a ni a. Kan hna zo turin hmabak thui tak a la awm a ni," tiin hmabak an la ngah thu a sawi a, veteran bowler Anderson a fak tel bawk.

Chak phu lo India

India captain Virat Kohli chuan, "Zep tur leh thup tur reng a awm lo. Tihsual kan nei a, chak kan phu lo a. Kan khelh danah chhuan tur reng a awm lo," tiin an mualpho thu a sawi.

Kum 29 mi Kohli chuan, "Batting lamah insiamṭhatna tur kan ngah a, kan inkawp fuh hleithei lo hi kan inenfiah a ṭul," tiin insiamṭhatna tur a sawi lang.