Rogers Cup champion Nadal

Rafael Nadal chuan Greek rawlthar Stefanos Tsitsipas thawnthu ngaihnawm ziah tumna chu a tihtawp sak a, world number 1 hian a vawi li nan Rogers Cup title a la.

Pathinni zan Toronto-a final inkhelah Grand Slam vawi 17 champion tawh Nadal hian darkar khat leh minute 45 chhungin 6-2, 7-6 (7-4) in hnehna a chang; kum 20 tlin champha lawmtu Tsitsipas hian set la ve lo mah se, set hnuhnung zawkah set point a hmuh a chhawr ṭangkai thei lo a, a tum ram a thleng zo lo.

Seeded pawh chang phak lo Tsitsipas hi 2008 hnu lamah seeded player ni lo final lut leh thei hmasa ber a ni a, Nadal a hmachhawn hma hian champion lai Alexander Zverev bakah tunlai player ṭha pahnih Dominic Thiem leh Novak Djokovic te a hneh thei a ni.

Kum 32 mi Nadal hian tennis a khelh hun chhungin ATP Tour title 80 zet a la tawh a, tun season chhungin French Open nomawi a chawi tawh bakah title dang pali a la tawh bawk - match 40 a khelh zingah vawi thum chiah chak loh neiin, season tawpa a ṭha zual pariat ten a khelh tur ATP Tour Finals atana tling chiang hmasa ber leh awmchhun a nih rih.

Title a lak hnuah Nadal chuan, "He hmunah hian 2010 kha ka inlan hnuhnung a ni tawh a, hun rei tak hnuah title ka la leh thei hi a hlu bik hle. Grass zawh chiah a hard court tournament khelh leh hi a awlsam lo a, match tinah hmasawna ka neih avangin lawmna tur hlir a ni," tiin a sawi.