Barca kutah Super Cup

Khelmual pawn lam boruak danglam leng vel karah Barcelona chuan Sevilla chu 2-1 a hnehin Spanish Super Cup 2018 an chawi a, inelnaah hian vawi 13 an champion-na chiah niin record nei ṭha ber an ni.

Spanish football federation chuan August 11, Inrinni khan Super Cup-ah hian European Union player ni lo pathum aia tam chawr theih a nih tur thu an sawi a, La Liga anga pathum chauh chawr theih a nih loh vangin Sevilla hian inlan loh an duh hial. Mahse, season hmasa Copa del Rey pahnihna hi an inlan ta tho.

Pathianni zan Tangier, Morocco-a inkhelah Sevilla lamin Pablo Sarabia hmangin goal hmahruai an khung a, Barcelona tan ram tana inkhelh a chawlhsan thu puang hlim Gerard Pique-a'n a sut hnuah Ousmane Dembele chuan chakna goal a khung - hun tawp dawnah Barca keeper Marc-Andre ter Stegen chuan Wissam Ben Yedder-a penalty pet chu a dan sak.

Barca an chungnung

Captain nghet a nih hnuah Lionel Messi-a'n a vawi khatna nan a naute khelmual chhungah a luh pui a, Argentine forward hian goal khung theihna hun ṭha hmu mah se a vanneih zan a ni lo - defender Jordi Alba pawhin Sevilla keeper tan hna hautak a siamsak ve bawk.

Manager thar Pablo Machin naute an phur a, Luis Muriel ball pass dawngtu Sarabia goal khung chu a lut lo angin lang mah se, video assistant referee (VAR) hman a nih hnuah pawm a ni.

Barcelona lamin goal khat an phur reng a, chawlhlawk hma deuhin Messi-a ball pet in goal ban a per rawn let lam chu Pique-a'n goalkeeper Tomas Vaclik dan hman lohin a khung. Sevilla midfielder Franco Vazquez-a'n an goal hnihna a khung teuh hle a, goal bar vangin Barca an him hlauh.

France international Dembele hun a thleng ve thung, Dortmund player hlui hian ball pet thiam a nih zia lantir nan minute 79-naah yard 20-a hla aṭangin goal bar a pet per dawp a, bar hnuai lam a per avangin goal-ah a lut zui.

Nomawi leh Messi

Lionel Messi-a'n Barcelona lo club dang a la nei lo a, Catalan club tan hian nomawi 33 zet a chawi ta - nomawi chawi hnem lamah Andres Iniesta nena record inṭawm an neih lai chu a kal pel a, La Liga champion tan record thar a siam chhunzawm.

Kum 31 mi Messi hian 2004-05 khan La Liga nomawi chu Barcelona tana a title hmasa ber ni turin a hlawh chhuak a, a hnu thla rei loteah Super Cup a la zui bawk. Nou Camp-ah hun a hman chhungin league nomawi pakua, Champions League pali, Copa del Rey paruk leh Spanish Super Cup pasarih bakah UEFA Super Cup leh FIFA Club World Cup vawi thum ve ve a la bawk.

Barca hian season thar inbuatsaihna an match hnuhnung ber atan Boca Juniors chu zaninah an hmachhawn dawn a, an league match hmasa ber chu August 19, Pathianni zan hian Alaves an hmachhawn ang.

Ngaihnawm
• Barcelona hian Super Cup hi vawi 13 an la tawh a, he inelnaah hian anni aia record nei ṭha an awm lo.
• Tun hnai season 10 chhunga a vawi 9 nan Barca hian Super Cup a khel a, heng zinga vawi rukah (2009, 2010, 2011, 2013, 2016 leh 2018) an champion.
• Sevilla tan Super Cup an vawi li khelhna a ni a, 2007 kha an khelh hmasak ber niin Real Madrid an hneh. A hnu lamah erawh Barcelona (2010, 2016 leh 2018) te an ngam lo vek.
• Marc-Andre ter Stegen hian Barcelona tan penalty vawi 11 a hmachhawn tawh zinga pali chu a dang.
• Pablo Sarabia hian 2018 chhungin inelna hrang hrangah goal 11 a khung tawh a, Sevilla player zingah goal khung hnem ber a ni.
Player Inlante :
Sevilla (3-4-2-1): Vaclik, Mercado (Ben Yedder 85), Kjaer, Gomez, Navas, Banega, Mesa, Escudero, Sarabia (Aleix Vidal 71), Vazquez, Muriel (Silva 60).
Barcelona (4-3-3): Ter Stegen, Semedo, Pique, Lenglet, Alba, Rafinha (Rakitic 46), Busquets, Arthur (Coutinho 53), Messi, Dembele (Arturo Vidal 86), Suarez.