LG Independence Cup Final – 4:00 PM ; Chhinga Veng dal turin Aizawl FC
LG Independence Cup final-ah tualchhung club ṭha pahnih Aizawl FC leh Chhinga Veng te chu tlai dar 4:00 hian Lammualah an inkhel dawn.
I League club AFC enkawltu Gift Raikhan hi season liam taa I League coach ṭha ber atana thlan an ni a, Manipur coach hi Neroca FC pahnihna nihpuitu a ni. Chhinga Veng coach Lalsangzuala Hmar hian kum zawnin MPL leh MFA Super Cup te a chawi tawh a, I Day Football-ah nomawi kawltu a nih bakah Santosh Trophy-a Mizoram coach a nih bawk avangin tun dinhmuna Mizo coach ṭha bera chhal theih a ni thung.
Coach ṭha pahnihin Mizo player ṭha rual an kawl khawm a, final hmuhnawm Lammualah thlir tur a awm dawn. Aizawl FC hian tualchhung football-a rorel mektu Chhinga Veng dan an tum dawn a, a awlsam lo ang.
Ennawm tur chu
Aizawl FC hian Chhinga Veng aṭangin Lalkhawpuimawia leh Lalrinchhana Tochhawng an lalut a, an ṭhatpui hle. Kelkang tlangval Mapuia hian tun inelnaah goal riat a khung tawh a, top scorer ni chiang tawh mah se nomawi an chawi loh chuan lawm a kim lo ang.
Defender tawnhriat nei ṭha Rinchhana hian tlarhnung a tiphui ringawt a ni lo a, set piece aṭangin goal thum ngawt a khung tawh a, team hruaitu ṭha a nihna hi Aizawl FC pawhin an hlawkpui hle.
Coach Gift Raikhan chuan midfielder Paul Ramfangzaua chu player ṭha zawkah a chher hriam bawk a, hming langsar David Lalrinmuana leh Alfred Kemah Jaryan karah a duai bik lo. Ramhlun North aṭanga an lakluh Lalrinfela'n a ball pet thiamna hmangin AFC-ah hmun pawimawh a chang nghal a, ani hi I League club-in goal nawrna kawngah an chhawr ṭangkai hle.
Chhinga Veng coach Sanga'n player ṭhahnem tak chan mah se la cham bang te pawh an ṭha a, mi thar an chher chhuak bawk. Electric Veng an hneh ṭuma man of the match-a thlan F. Lalnuntluanga chuan season liam taa MPL Under 18 a champion pui hnuah senior team-ah hmun a chang pha tawh a, coach Sanga chuan, "Hmingin player ka thlang lo. Duhsak ka nei lo a, training-naa che ṭha apiang ka thlang mai ṭhin," tiin Vanglaini a hrilh.
Chhingcows hian tlarhnung hmunruak hnawhkhat turin Lunglei tlangval Vanlalzuidika leh R. Laldinpuia te an lafuh a, keeper Zothanmawia an kawl bawk avangin tlarhnung a la ṭha reng. Tlarhma lamah MS Dawngliana tawnhriat a pawimawh a, Bawngkawn tlangval hian mawhphurhna tak tak a chelh hnuah tun hmaa a ṭhatna ang khan a rawn khel chhuak lehah a ngaih theih bawk.
Engtin zel?
Entu mipui tana chanchin lawmawm chu team pahnih player-te an dam kim a, vawiin hian an ṭhat dan berin an rawn inlan dawn. Chhinga Veng lamin foreingner nei lo mah se Sanga a zam phah lo. Chhingcows coach chuan, "Foreigner kan neih loh hi chhuanlamah hman kan tum lo. Mizo rilru put hmang huaiseina nen kan khel ang a, ka player ten 101% an hman phawt chuan champion thei tur team kan nei a ni," tiin a sawi.
Aizawl FC coach Gift Raikhan chuan, "Ka kalna apiangah hian eng team pawh enkawl ila danglamna lantir zel ka duh. Hmasawnna a chak lo a nih pawhin kan inkhel en ṭhin chuan MFA Super Cup-a Aizawl FC leh tuna kan team danglamna chu an hmu thei ang," tiin hma an sawn zel thu a sawi.
Inkhel en tura mipui sawmin Gift chuan, "Mizoten football hmangin Independence Day hi lawm se ka duh. Football hmuhnawm khelh kan duh ve ve a, kan chak lo a nih pawhin Chhinga Veng ṭantute an lawm mai ang a. Kan chak a nih chuan min ṭantute an hlim thung ang. Kan duh chu Lammuala mipui tam thei ang ber pung khawm se tih hi a ni," tiin Vanglaini a hrilh.
Lawmman
Champion Rs 1,00,000 + Trophy
Runner Up Rs 80,000
Semifinalist Rs 50,000
Mizoram Police & Electric Veng
Fair Play Rs 30,000
Mimal Lawmman
Best Player Rs 5,000
Best Forward Rs 4,000
Best Midfielder Rs 4,000
Best Defender Rs 4,000
Best Goalkeeper Rs 4,000
Final Kalkawng
Aizawl FC
Group Stage
Aizawl FC 1–2 Electric Veng FC
AFC: Lalkhawpuimawia 85'
EFC : Isak Vanlalpeka 18'; Vanlalhmangaiha 27'
MoM: Lalrinnunga, EFC
Chanmari FC 0–6 Aizawl FC
AFC: Lalrinfela 20'; Lalrinchhana Tochhawng 24'; Lalkhawpuimawia 61', 66', 81'; Hmangaihkima 77'
MoM: Lalkhawpuimawia, AFC
Aizawl FC 2–1 Ramhlun Norh FC
AFC: Lalrinchhana Tochhawng 14'; David Lalrinmuana 24'
RNFC: Vanlalawma 5'
MoM: Lalrinchhana Tochhawng, AFC
Bethlehem VT 0–5 Aizawl FC
AFC: Paul Ramfangzauva 17'; Lalkhawpuimawia 25', 26';
Alfred Kemah Jaryan 36', 74'
MoM: Alfred Kemah Jaryan, AFC
Semifinal
Aizawl FC 4–2 Mizoram Police FC
AFC: Lalrinchhana Tochhawng 11'; Lalkhawpuimawia 39', 49';
F Lalremsanga 90+4'
MPFC: R Malsawmtluanga 56'; Malsawmfela 86'
MoM: Lalkhawpuimawia, Aizawl FC
Chhinga Veng
Group Stage
Chhinga Veng FC 2-0 Kanan FC
CVFC: Vanlalzuidika 13'; Lalromawia 73'
MoM: Lalromawia, CVFC
Mizoram Police 1–2 Chhinga Veng FC
MPFC: R Malsawmtluanga 43' (P)
CVFC: Lalmuansanga 18'; Lalrinchhana 87'
MoM: MS Dawngliana, CVFC
Chhinga Veng 1-0 Jamshedpur
CVFC: MS Dawngliana 3'
MoM: MS Dawngliana, CVFC
Chawnpui FC 0–1 Chhinga Veng
CVFC: MS Dawngliana 70'
MoM: Lalruatfela, Chawnpui FC
Semifinal
Electric Veng FC 0–2 Chhinga Veng FC
CVFC: Lalrinchhana 36'; Lalthlamuana 62'
MoM: F Lalnuntluanga, Chhinga Veng FC