LBS Suzuki CYMA Basketball ; Vawiinah quarterfinal khelh a ni dawn

LBS Suzuki 7th CYMA Inter Branch YMA Basketball Tournament chu vawiin aṭangin quarterfinal khelh ṭan a ni dawn. Inelna hi R. Dengṭhuama Indoor Stadium-ah an insawn lut dawn a, Zonet HD-ah live telecast a ni ang.

A thiam pariat zingah CYMA Basketball inelna hmasa paruka champion tawh an tel pha lo a, quarterfinal inkhel pariat zingah tlai dar 3:45-a inkhel tur Ramthar Veng leh Khatla chu hmuhnawm ber tura ngaih a ni.

DPVT an tla!

Nimin khan pre quarterfinal khelh zawh a ni a, Leitan-in overtime-ah Dawrpui Vengthar an hneh. DPVT hian CYMA Basketball hma hian an veng Golden Jubilee puala inelna an buatsaihah an champion a, quarterfinal lut ngei tura ngaih ni mah se tun hnaia basketball-a hmasawn tak Leitan lakah an beiseina a thamral.

Inkhel dang pathumah upset a thleng lo. Khatla South, Chawnpui leh Ramhlun North ten an khingpui an hneh.

Quarterfinal chu

Chawhma dar 10:00-ah champion lai Tuikual South hnehtu Bungkawn leh 2018 champion hnehtu Dawrpui te an inkhel dawn a, talent nei ṭha player an kawl ve ve avangin inkhel hmuhnawm a ni ang.

Leitan-in DPVT an hneh tak avangin Khatla South kawng a awlsam sawt tura ngaih a ni a, amaherawhchu Leitan hian Khatla South tan ni loin champion kawng an zawh theih nan DPVT an neh tih hriat a ṭha.

Chawnpuiin basketball an khel hma a, tun thlenga CYMA Basketball nomawi an la chawi lo hi a fuh lo. Kumin hi an tan hun ṭha a ni a, Ramhlun North lakah chak tura rinkai zawk an ni ang.

A tawp berah basketball ngainatute hmuh châk Ramthar Veng leh Khatla te an inkhel dawn. Ramthar Veng hian Chawnpui buatsaih inelnaah an thiam zia pholangin nomawi an chawi. Khatla erawh inelna ṭan hma ni loin inelna ṭan hnua champion rinkai zinga rawn tel a ni a, an phur vanglai tak hi Ramthar Veng hneh theihna hun ṭha a ni.

Last 16 - Hawla Indoor Stadium
August 13, Thawhtanni
Khatla 82 - 60 Zotlang
Bungkawn 83 - 78 Tuikual South
Dawrpui 80 - 77 Republic Veng
Ramthar Veng 77 - 52 Ramhlun South
Nimin Inkhel Results
Ramhlun North 66 - 63 Kanan
Leitan 80 - 78 (OT) Dawrpui Vengthar
Khatla South 94 - 78 Vaivakawn
Kulikawn 49 - 71 Chawnpui
Quarterfinal - August 15, Nilaini
R. Dengthuama Multipurpose Hall
Bungkawn 10:00 AM Dawrpui
Khatla South 11:45 AM Leitan
Ramhlun North 2:00 PM Kulikawn/Chawnpui
Ramthar Veng 3:45 PM Khatla