Murray a chak lo nghal

Cincinnati Masters khelh ṭan a ni a, hliam dam hlim Andy Murray chu a match hmasa berah Lucas Pouille hneh loina tla nghal. Thawhṭanni zan inkhelah Murray hi 6-1, 1-6, 6-4 in a chak lo - US Open inbuatsaihna ṭha tak a nei thei lo.

World number 1 hlui Murray hian tihsual a ngah hle a, set hmasa berah pawh double faults vawi ruk ngawt neiin; French tlangval lakah hian a service chu vawi thum a hloh bawk. Britain tlangval hian set hnihna la let ve thei mah se, set hnuhnung berah erawh a hnuai hnung zawkah a ṭang leh ta tho.

Grand Slam vawi thum champion tawh Murray hi season hmasa Wimbledon khelh ṭum khan a khel bawr a hliam a, he a natna vang hian season khat deuh thaw a chawlh a ngai, a hliam dam hnuah tournament pali khel leh tawhin nomawi a la chawi leh lo a ni.

Inkhel dangah Canada tlangval Denis Shapovalov chuan khawtual star Frances Tiafoe chu 7-6, 3-6, 7-5 in a hneh a, Japanese player Kei Nishikori pawhin Andrey Rublev lakah straight sets-in hnehna a chang, seeded 13-na Pablo Carreno Busta chuan Richard Gasquet 6-3, 2-6, 6-3 in a hneh bawk.

Player ṭha tam takin Cincinnati Masters hi US Open inbuatsaih nan an hmang a, world number 1 Rafael Nadal erawh Rogers Cup khel zo hlim a nih avangin a inhnukdawk thung - Pathianni zan khan Nadal hian Stefanos Tsitsipas hnehin tennis a khelh hun chhunga a nomawi 80-na a chawi.

Spanish player Nadal chuan, "Cincinnati Masters ka khel lo tur hi pawi ka ti takzet, inelna buatsaihtu leh fans lakah ngaihdam ka dil e. Pathianni zanah Rogers Cup kan khel zo chiah a, kar thara inelna hautak khelh chhunzawm leh chu ka kum ngaihtuahin a tlin tawh lo, taksa dinhmun ngaihtuah tel a ngai tawh a ni," a ti.

Nadal hian tun season Grand Slam pathum an khelh tawh zingah French Open a chawi a, inelna lian hnuhnung ber US Open khelh hmain season khar nana hman tur ATP Tour Finals khel turin a tling chiang tawh a ni.