Beisei ngam loh beiseitu Maubawk

LG Independence Cup Women's Football-ah Govt. Maubawk High School chuan nomawi an beisei ngam ta, amaherawhchu final-ah champion lai Pachhunga University College an hmachhawn dawn avangin hmabak a hau tak khawp ang.

Hmeichhe final hi vawiin tlai dar 2:00 hian khelh a ni dawn a, college inelnaa ṭantu nei ṭha thei ang bera sawi ṭhin PUC hian Lammual an mawi pha dawn. Maubawk High School tan khelmual pawna elpha tur chuan Maubawk khawtlangin an ṭawiawm a ṭul ang, chutichung pawh chuan PUC hian au hla ṭha tak "We came from the valley deep" a neih sa avangin khelmual pawnah pawh champion lai hi an la ṭha fan.

PUC hian champion tur hian nikum khan college inelna hrang hranga an elpui ber pakhat Hrangbana College chu 11-0 in an sawp a, Maubawk lakah pawh hian anmahni ṭantute au tam theihna turin goal tam thei ang ber khung an duh ang.

Maubawk High School lamin match hmasa berah Hrangbana College chu Lalbiakdiki goal hmangin an barakhaih tawh a, Biakdiki goal hmang thoin New Horizon School an hneh leh bawk. Semifinal-ah thawnthu lawmawm dangin a rawn belh a, final lut tura rinkai zawk Govt Aizawl College chu Biakdiki goal hmangin hun pangngaiah 1-1 in an inhnehtawk pui a, penalty shootout-ah 3-0 in an chak. Final-ah goal a lut lo a nih pawhin penalty pet turin PUC aiin Maubawk an phur zawk ang.