De Gea tan contract a hnai

Manchester United chuan David de Gea contract chungchangah keeper aiawh nen inbiakna an kalpui mek a, contract thar ziah pui turin an inringtawk hle. Spanish keeper hian kum 2019 thleng Old Trafford-a cham turin contract a nei a, United hian season khat pawhsei theih dan an la nei bawk.

Tun nipui transfer-ah Real Madrid-in Chelsea aṭangin Thibaut Courtois an lalut a, Spanish club lian hian De Gea an beisei a rinawm tawh loh. Los Blancos hian kum 2015 khan De Gea hi an lalut hman ṭep a, minute tlem tea lehkha pawimawh a thlen loh vang chauhin transfer hi a tlawlh. Amaherawhchu, Real-in Belgian keeper an lak takah chuan De Gea contract pawhsei hi United tan a awlsam sawt a rinawm.

Manchester United hian May 2011 khan Atletico Madrid aṭangin De Gea hi pound maktaduai 18.9 in an lalut a, season liam ta khan United hi pahnihna nih puiin a kum li nan club player of the year-ah thlan a ni. World Cup 2018-ah erawh De Gea a khel ṭha lo a, Spain chet chhiat chhan pakhatah a ngaih theih. Chutihrualin De Gea erawhin a thiamna a la nei reng a, Jose Mourinho hoten Premier League match hmasa bera Leicester City 2-1 a an hneh ṭumin a khel ṭha hle.